వైఎస్ జగన్‌ది రాజకీయ దీక్ష కాదు: అనకాపల్లి ఎంపీ సబ్బం హరి

విశాఖపట్టణం: మాజీ పార్లమెంటు సభ్యుడు వైఎస్ జగన్మోహన్‌రెడ్డి ఈ నెల 11న రైతుల కోసమంటూ దేశ రాజధాని న్యూఢిల్లీలో చేపట్టిన దీక్ష రాజకీయ దీక్ష కాదని అనకాపల్లి పార్లమెంటు సభ్యుడు, జగన్ వర్గం నేత సబ్బం హరి ఆదివారం అన్నారు. జగన్ రైతుల కోసం చేస్తున్న దీక్షను రాజకీయ కోణంలో చూడవద్దని సూచించారు. దీనికి రాజకీయాలు అంటగట్టాల్సిన అవసరం లేదన్నారు.

రాష్ట్ర ప్రయోజనాలు, సామాన్యుల సమస్యల పరిష్కారానికి ప్రభుత్వాన్ని సమాయత్తం చేయాల్సిన ఆవశ్యకత ఉందన్నారు. దానిని జగన్ చేస్తున్నారన్నారు. విశాఖలో జగన్ చేపట్టిన ఓదార్పు యాత్రకు భారీగా అభిమానులు తరలి వచ్చారన్నారు. జగన్ ఓదార్పు యాత్ర ఢిల్లీ దీక్ష అనంతరం యదాతథంగా కొనసాగుతుందని చెప్పారు.