ముఖ్యమంత్రి కిరణ్ కుమార్ రెడ్డిపై కాంగ్రెసు తెలంగాణ నేతల గుర్రు

హైదరాబాద్: ముఖ్యమంత్రి ఎన్. కిరణ్ కుమార్ రెడ్డిపై కాంగ్రెసు తెలంగాణ నాయకులు గుర్రుమంటున్నారు. ఆయనపై తీవ్ర ఆగ్రహం వ్యక్తం చేస్తున్నారు. తాము రేపు మంగళవారం తలపెట్టిన కాంగ్రెసు తెలంగాణ ప్రాంత విస్తృత స్థాయి సమావేశానికి రాకుండా మంత్రులను కిరణ్ కుమార్ రెడ్డి అడ్డుకుంటున్నారని వారు ఆరోపిస్తున్నారు. తెలంగాణ ప్రాంత మంత్రులను పిలిపించుకుని ఆయన మాట్లాడుతున్నారని, సమావేశానికి వెళ్లవద్దని ఆదేశిస్తున్నారని వారు విమర్శిస్తున్నారు.

తెలంగాణ సాధన, భవిష్యత్తు కార్యాచరణలపై చర్చించడానికి మంగళవారం మధ్యాహ్నం మూడు గంటలకు కాంగ్రెసు తెలంగాణ ప్రాంత నాయకుల సమావేశాన్ని ఏర్పాటు చేశారు. ఈ సమావేశానికి కేంద్ర మంత్రి జైపాల్ రెడ్డిని, ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్‌ను కూడా వారు ఆహ్వానించారు. తెలంగాణ ప్రాంత జిల్లా కాంగ్రెసు కమిటీల అధ్యక్షులను కూడా పిలిచారు.