తెలంగాణ జిల్లాల్లో కలెక్టరేట్ల వద్ద తెలంగాణ జెఏసి ధర్నా

హైదరాబాద్: తెలంగాణలోని పది జిల్లాల కలెక్టరేట్ల వద్ద సోమవారం తెలంగాణ ఐక్య కార్యాచరణ సమితి ఆధ్వర్యంలో పెద్ద ఎత్తున ఆందోళన, ధర్నా నిర్వహించారు. శ్రీకృష్ణ కమిటీ నివేదికతో సంబంధం లేకుండా కేంద్ర ప్రభుత్వం వచ్చే పార్లమెంటు బడ్జెట్ సమావేశాల్లో తెలంగాణ బిల్లు ప్రవేశపెట్టాలని వారు కలెక్టరేట్ల వద్ద ధర్నాకు దిగారు. శ్రీకృష్ణ నివేదికతో తమకు సంబంధం లేదని డిమాండ్ చేశారు. కేంద్ర ప్రభుత్వం 2009 డిసెంబర్ 9న చేసిన ప్రకటనకు కట్టుబడి ఉండాలని డిమాండ్ చేశారు. ఈ ధర్నాకు తెలంగాణ రాష్ట్ర సమితి, భారతీయ జనతా పార్టీ, తెలంగాణ ఐక్య కార్యాచరణ సమితిలు మద్దతు తెలిపాయి.

రంగారెడ్డి జిల్లా కలెక్టరేట్ కార్యాలయం వద్ద భారతీయ జనతా పార్టీ సీనియర్ నాయకుడు, మాజీ మంత్రి బద్దం బాల్‌రెడ్డి, తెలంగాణ రాష్ట్ర సమితి అధ్యక్షుడు ఎ.చంద్రశేఖర్ పాల్గొన్నారు. మహబూబ్‌ నగర్ జిల్లా కలెక్టరేట్ కార్యాలయం వద్ద ధర్నాలో తెలంగాణ రాజకీయ ఐక్య కార్యాచరణ సమితి చైర్మన్ ప్రొఫెసర్ కోదండరామ్ పాల్గొన్నారు. కాంగ్రెస్, తెలుగుదేశం పార్టీకి చెందిన తెలంగాణ నేతలు తెలంగాణ ప్రత్యేక రాష్ట్రానికి ఉద్యమించాలని వారు కోరారు. కాగా రంగారెడ్డి జిల్లా కలెక్టరేట్ కార్యాలయం వద్ద ధర్నా కారణంగా లక్డికాపూల్ వద్ద భారీగా రాకపోకలు స్తంభించిపోయాయి.