వైయస్ జగన్‌ ను తిప్పికొట్టడానికి డి. శ్రీనివాస్ పరోక్ష సూచనలు

హైదరాబాద్: మాజీ పార్లమెంటు సభ్యుడు వైయస్ జగన్‌ను దృష్టిలో పెట్టుకుని ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ పార్టీ నాయకులకు కొన్ని సూచనలు చేశారు. వైయస్ జగన్ చేస్తున్న విమర్శలను, సాక్షి మీడియాలో వస్తున్న వార్తాకథనాలను, జగన్ వెంట వెళ్తున్న పార్టీ ప్రజాప్రతినిధులను దృష్టిలో ఉంచుకుని ఆయన ఆ సూచనలు చేశారు. పార్టీ జిల్లా, నగర అధ్యక్షులు, పిసిసి సమన్వయకర్తల సమావేశంలో ఆయన బుధవారం మాట్లాడారు. ఇతరుల వెంట వెళ్లిన నాయకులను పార్టీ అధిష్టానం చూసుకుంటుందని ఆయన చెప్పారు. పార్టీపై, పార్టీ అధ్యక్షురాలు సోనియా గాంధీపై వస్తున్న విమర్శలను సమర్థంగా ఎదుర్కోవాలని ఆయన సూచించారు.

పార్టీని వదిలివెళ్లినవారి జాబితాను రూపొందించాలని ఆయన నాయకులను ఆదేశించారు. పార్టీని బలోపేతం చేయాల్సిన బాధ్యత అందరిపై ఉందని చెప్పారు. రాష్ట్రస్థాయి వరకు అభివృద్ధి కమిటీలను వేయాలనే యోచనలో పిసిసి ఉన్నట్లు సమాచారం. ఈ అభివృద్ధి కమిటీల ద్వారా ప్రభుత్వ కార్యక్రమాలను ప్రజల్లోకి తీసుకువెళ్లాలని ఆయన సూచించారు. రానున్న కాలంలో చేపట్టాల్సిన కార్యక్రమాలపై, వైయస్ జగన్ వ్యవహారంపై, శ్రీకృష్ణ కమిటీ అనంతర పరిణామాలపై సమావేశంలో చర్చించారు. ఈ సమావేశంలో ముఖ్యమంత్రి కిరణ్ కుమార్ రెడ్డి కూడా పాల్గొన్నారు.