జగన్ ‌పై కాలుదువ్వుతున్న డిఎల్: ఎమ్మెల్యేలతో సై అంటే సై

హైదరాబాద్: మంత్రి డిఎల్ రవీంద్రారెడ్డి మాజీ పార్లమెంటు సభ్యుడు వైయస్ జగన్మోహన్‌రెడ్డితో తాడోపేడో తేల్చుకోవడానికి సిద్ధపడ్డట్టుగా తెలుస్తోంది. ఇటు డిఎల్, అటు జగన్ వర్గం కడప జిల్లా ఎమ్మెల్యేల రాజీనామా సవాళ్లు, ప్రతి సవాళ్లు తారాస్థాయికి చేరినట్టుగా కనిపిస్తున్నాయి. డిఎల్ రాజీనామాకు సై అనడంతో డిఎల్ మొదట రాజీనామాతో సిద్ధంగా ఉంటే తాము సిద్ధమని ప్రకటించటంతో డిఎల్ స్పందించారు. తాను ఉపసభాపతి నాదెండ్ల మనోహర్ వద్ద రాజీనామా పట్టుకొని సిద్ధంగా ఉండి వారికి సవాల్ విసిరేందుకు డిఎల్ నిశ్చయించుకున్నట్టుగా తెలుస్తోంది.

నేటి వరకు శాఖాపరమైన ప్రయత్నాల్లో నిమగ్నమై ఉన్న డిఎల్ నాదెండ్లను అపాయింట్‌మెంట్ కోరినట్టుగా తెలుస్తోంది. తాను రాజీనామాకు రెడీగా ఉండి జగన్ వర్గానికి ఇబ్బందుల్లో నెట్టడానికే అపాయింట్‌మెంట్ అడిగినట్టుగా సమాచారం. ఇప్పటికే కడప, పులివెందులలో జగన్, విజయమ్మ రాజీనామాలతో ఉపఎన్నికలకు వస్తున్నాయి. ఇప్పుడు తనతో పాటు జగన్ వర్గం కమలమ్మ, శ్రీకాంత్‌రెడ్డి, ఆదినారాయణరెడ్డి తదితరులు నలుగురు రాజీనామా చేస్తే మొత్తం ఏడు అసెంబ్లీ నియోజకవర్గాలకు, 1 పార్లమెంటు నియోజకవర్గానికి ఉపఎన్నికలు జరుగుతాయని అప్పుడు ఎవరి సత్తా ఏమిటో తెలుస్తుందని ఆయన భావిస్తున్నట్టుగా తెలుస్తోంది.

ఆవేశంలో ఉన్న డిఎల్ రవీంద్రారెడ్డి జగన్ వర్గంతో తేల్చుకోవడానికి నిశ్చయించుకోవడంతో ముఖ్యమంత్రి కిరణ్‌కుమార్‌రెడ్డి సముదాయిస్తున్నట్టు తెలుస్తోంది. రాజకీయాల్లో ఆవేశాలు ఉండకూడదని చెప్పినట్టుగా తెలుస్తోంది. కాగా డిఎల్ అపాయింట్‌మెంట్‌కు నాదెండ్ల స్పందించాల్సి ఉంది. నాదెండ్ల కనుగ అపాయింట్‌మెంట్ ఇస్తే డిఎల్, జగన్ వర్గాన్ని ఢీకొట్టేందుకు పూర్తిగా సన్నద్ధమయినట్టుగా తెలుస్తోంది.