తెలంగాణపై సంప్రదింపుల ప్రక్రియ కొనసాగుతుంది: ప్రధాని మన్మోహన్ సింగ్

న్యూఢిల్లీ: ప్రత్యేక తెలంగాణ అంశంపై శ్రీకృష్ణ కమిటీ ఇచ్చిన నివేదికను అధ్యయనం చేస్తున్నామని, దీనిపై సంప్రదింపుల ప్రక్రియ కొనసాగుతుందని ప్రధానమంత్రి మన్మోహన్‌సింగ్‌ వ్యాఖ్యానించారు. మంత్రివర్గ ప్రమాణస్వీకారం తర్వాత రాష్ట్రపతి భవన్‌ వద్ద ఆయన మీడియా ప్రతినిధులు అడిగిన ప్రశ్నలకు సమాధానాలిచ్చారు. "ఆంధ్రప్రదేశ్ ‌కు చెందిన రాజకీయవేత్తలతో హోంమంత్రి సమావేశాన్ని నిర్వహించారు. శ్రీకృష్ణ కమిటీ నివేదికను అధ్యయనం చేస్తున్నాం. దీనిపై సంప్రదింపులు కొనసాగుతాయి" అని ఆయన తెలంగాణపై స్పందిస్తూ అన్నారు.

ఇది చాలా చిన్నదని, మేలో జరిగే బడ్జెట్‌ సమావేశాల తర్వాత భారీగా విస్తరణ ఉంటుందని ఆయన మంత్రివర్గ విస్తరణపై అన్నారు. 2జీ స్పెక్ట్రమ్‌ వివాదాన్ని ప్రస్తావిస్తూ...పార్లమెంటును సజావుగా నిర్వహించాలన్న ఉద్దేశంతో ప్రభుత్వం ఉందని, అందుకు అవసరమైన అన్ని మార్గాలనూ అన్వేషిస్తామని మన్మోహన్‌ చెప్పారు. సమస్యలను చూసి భయపడటంలేదని, అన్ని సమస్యల్నీ పార్లమెంటులో చర్చించడానికే ప్రభుత్వం సుముఖంగా ఉందని తెలిపారు. మార్చినెల కల్లా ధరల్లో స్థిరత్వం వస్తుందని, కొన్ని అంశాలు ప్రభుత్వ పరిధిలో ఉండవని అన్నారు.