గన్నవరంలో వింత దొంగతనం: చోరీకి గురైన బస్సు పట్టివేత

విజయవాడ: కృష్ణా జిల్లో గన్నవరంలో ఓ వింత దొంగతనం జరిగింది. గన్నవరం డిపోకు చెందిన ఎపి11జెడ్ 1025 నంబరు గల బస్సును సోమవారం అర్ధరాత్రి ఓ క్లీనర్ దొంగతనం చేసినట్టుగా సమాచారం. బస్సు లేక పోవడాన్ని గమనించిన డిపో అధికారులు మంగళవారం ఉదయమే గన్నవరం పోలీసు స్టేషన్‌లో బస్సు పోయిందంటూ ఫిర్యాదు చేశారు. గన్నవరం సిఐ రమణారెడ్డి వెంటనే అలర్ట్ అయ్యారు. చుట్టూ ప్రక్కల అన్ని ప్రాంతాల పోలీసుల స్టేషన్లకు సమాచారం అందించారు. పలు చెక్ పోస్టుల వద్ద చెకింగ్ చేశారు. కాగా చివరకు తూర్పుగోదావరి జిల్లాలో మంగళవారం ఉదయం బస్సు దొరికింది.

బస్సును ఓ క్లీనర్ దొంగిలించినట్లుగా తెలుస్తోంది. బస్సును అమ్ముకోవడానికే తీసుకు వెళ్లినట్లుగా పోలీసులు భావిస్తున్నారు. గన్నవరం డిపోనుండి బస్సును దొంగిలించిన అతను తణుకు చెక్ పోస్టు మీదుగా తూర్పు గోదావరి వెళ్లినట్లుగా తెలుస్తోంది. కాగా బస్సులను ఏ రోజుకు ఆ రోజు ఎప్పటికప్పుడు చెక్ చేస్తున్నామని డిపో మేనేజరు చెబుతున్నారు. అయితే బస్సు డిపోనుండి బయటకు వెళుతున్నప్పుడు గుర్తించక పోవటం గమనార్హం. కాగా ఇంతకుముందు కూడా ఒకటిరెండు బస్సు దొంగతనాలు చోటు చేసుకోవడం విశేషం.