అవి పద్మ అవార్డులా.. లేక ప్రభుత్వ అవార్డులా..?

హైదరాబాద్: దేశంలో రాజకీయాలు ఎంతగా కుళ్లి పోయాయో చెప్పడానికి ఇటీవల ప్రభుత్వం ప్రకటించిన పద్మ అవార్డులే నిదర్శనం. ప్రతిభకు గుర్తింపుగా అందిచాల్సిన అవార్డులను తమ రాజకీయ ప్రాబల్యం కోసం వాడుకుంటున్న రోజులివి. కేంద్ర (కాంగ్రెస్) ప్రభుత్వం మొత్తం 126 మందికి పద్మ అవార్డులను ప్రకటించింది. అందులో 13 పద్మభూషన్ అవార్డులు, 31 పద్మవిభూషన్, 84 పద్మశ్రీ అవార్డులున్నాయి. అయితే తాజాగా ప్రకటించిన పద్మ అవార్డులపై కూడా ఎప్పటిలానే విమర్శలు వెల్లువెత్తున్నాయి. పద్మ అవార్డులను సాధించడానికి పెద్దగా అర్హతలు అక్కర్లేదు... అధికారంలో ఉన్న ఏ ప్రభుత్వానికైనా (కాంగ్రెస్ లేదా భాజాపా లేదా మరే పార్టీ అయినా సరే) సానుకూలంగా వ్యవహరిస్తే చాలు అంతకన్నా పెద్ద అర్హతలు అవసరం లేదనేది విమర్శకుల వాదన.

ఇదే అవకాశాన్ని అందిపుచ్చుకున్న కాంగ్రెస్ కూడా తమకు అనుకూలంగా వ్యవహరించిన వారికే పద్మ అవార్డులను ప్రకటించిందని, భవిష్యత్తులో ఎన్నికల నిధులకు లేదా ఎన్నికల ప్రచారానికి అస్త్రంగా ఈ అవార్డులను వాడుకుందనేది పలువురి వాదన. మొత్తం పద్మ అవార్డులలో 50 శాతం అవార్డులు కాంగ్రెస్ అధికారంలో ఉన్న ఢిల్లీ (22 అవార్డులు), మహారాష్ట్ర (18 అవార్డులు), ఆంధ్రప్రదేశ్ (12 అవార్డులు), తమిళనాడు (12 అవార్డులు) వంటి రాష్ట్రాలకే దక్కడం గమనార్హం. మొత్తం 126 అవార్డులలో 63 అవార్డులు ఈ నాలుగు రాష్ట్రాలకు వెళ్లిపోయాయి, మిగిలిన అవార్డులను దేశంలోని 26 రాష్ట్రాలు పంచుకున్నాయి. అంటే, ఈ నాలుగు రాష్ట్రాలతో పోలిస్తే.. దేశంలోని మిగిలిన రాష్ట్రాలలో వారికన్నా ప్రతిభ కలిగిన వారు లేరా..? అనేది విమర్శకుల ప్రశ్న.

వాస్తవానికి తమిళనాడులో కాంగ్రెస్ అధికారంలో లేకపోయినా డిఎంకేతో తమకున్న సంబంధాలు తెగిపోకుండా ఉండేందుకు ఈ అవార్డులు ప్రకటించారనే వాదనలు కూడా వినిపిస్తున్నాయి. ఏదైతేనేం ఈసారి ప్రకటించిన పద్మ అవార్డులలో పారదర్శకత లోపించిందని గట్టిగా వాదించేవాళ్లు లేకపోలేదు. అందువల్లనే ప్రజల్లో ఈ అవార్డులపై ఆసక్తి తగ్గిపోయింది. ఒకప్పట్లో ఇటువంటి అవార్డుల పొందిన సదరు వ్యక్తులను చాలా గొప్పవాళ్లుగా భావించేవాళ్లు. కానీ ఇప్పుడు వీటికి రాజకీయ రంగు పులుమడంతో ప్రజలు కూడా ఈ అవార్డులపై పెద్దగా ఆసక్తి చూపుతున్నట్లు కనబడటం లేదని విమర్శకులు భావిస్తున్నారు.