వైయస్ జగన్, వైయస్సార్ కలిసి కోట్లకు కోట్లు దోచుకున్నారు: కాకా

తిరుమల: దివంగత నేత వై.ఎస్‌.రాజశేఖరరెడ్డి, ఆయన తనయుడు జగన్‌లు కోట్లకు కోట్లు ప్రజాధనాన్ని దోసుకున్నారని కాంగ్రెస్‌ కురు వృద్ధుడు జి.వెంకటస్వామి తీవ్రస్థాయిలో ధ్వజమెత్తారు. తన రాజకీయ జీవితకాలంలో వాళ్లలాగా అక్రమాలకు పాల్పడిన వాళ్లను చూడలేదని వ్యాఖ్యానించారు. శ్రీవారి దర్శనార్థం శుక్రవారం తిరుమలకు వచ్చిన ఆయన తనను కలిసిన విలేకరులతో మాట్లాడారు. తాను ఏడెనిమిది మంది ముఖ్యమంత్రులను చూశానని, 53 ఏళ్లకింద ఎమ్మెల్యేనయ్యానని, అప్పట్లో నీలం సంజీవరెడ్డి ముఖ్యమంత్రిగా ఉన్నారని, అంతకన్నా ముందున్న ముఖ్యమంత్రులను కూడా చూశానని, వైఎస్‌లాగా దోచుకున్న వాళ్లు ఉన్నారా? ఏందిదీ కోట్లకు కోట్లేనా దోచుకునేది? ఇది ప్రజల సొత్తు కాదా? వాస్తవాలు వెలుగులోకి వస్తున్నాయని ఆయన అన్నారు. జగన్‌ ఇప్పుడు రా... జనం ముందుకు అని ఆయన సవాల్ చేశారు.

"మీ అయ్య చేసిన పనుల మీద ప్రజల ముందుకు రా తెలుస్తుంది. ప్రజల డబ్బు కోట్లకు కోట్లే.. ఏంటిదీ? జగన్‌ వెంట వెళ్లిన ఎమ్మెల్యేలు హైకోర్టు నోటీసులను చూసి, వాస్తవాలు తెలుసుకుని ఆశ్చర్య పోతున్నారు. అబ్బా జగన్‌ వెంట ఇంకేం పోతామయ్యా. వాడే జైలుకు పోయేటట్టుగా ఉంది అని భయపడుతున్నారు. ఇవి నేను మాట్లాడే మాటలు కాదు. ప్రజలు అనుకుంటున్నారు" అని వెంకటస్వామి (కాకా) అన్నారు. "ఇవన్నీ చూసి జగన్‌ వెంట ఎవరు వెళతారు? రెండు మూడు రోజులు ఆగి చూడండి. జగన్‌ వెంట ఎంతమంది ఎమ్మెల్యేలుంటారో తేలుతుంది. అక్రమాలపై హైకోర్టు జోక్యంతో ఎమ్మెల్యేలు భయపడుతున్నారు" అని ఆయన అన్నారు. "తెలంగాణ తెస్తానంటూ ప్రజలను కేసీఆర్‌ మోసం చేశాడు. శ్రీకృష్ణ కమిటీ నివేదికతో ఎలాంటి ఫలితం లేదు. అందులో ఏ విషయమూ విస్పష్టంగా చెప్పలేదు" అని విమర్సించారు.