మంత్రుల కుమారులు వ్యాపారం చేయవద్దా?: గల్లా అరుణకుమారి

తిరుపతి: మంత్రుల కుమారులు వ్యాపారాలు చేయకూడదా అని రాష్ట్ర గనుల శాఖ మంత్రి గల్లా అరుణకుమారి ప్రశ్నించారు. శ్రీకాకుళం జిల్లాలోని కన్నెధార గనుల తవ్వకాలను మంత్రి కుమారుడికి లీజుకు ఇచ్చారని అంటున్నారని, మంత్రి కుమారుడైతే వ్యాపారాలు చేయకూడదా అని ఆమె శనివారం మీడియా ప్రతినిధులతో అన్నారు. శ్రీకాకుళం జిల్లా కన్నెధార గ్రానైట్‌ గనుల లీజు వ్యవహారంలో ఆ శాఖ అధికారిపై గిరిజనుల దాడిపై ఆమె స్పందించారు.

గనుల శాఖ అధికారిపై గిరిజనులు దాడి చేసిన విషయం తన దృష్టికి రాలేదన్నారు. కొన్ని రోజుల్నుంచి రచ్చబండ కార్యక్రమంలో బిజీగా ఉన్నానని చెప్పారు. అవినీతి చోటు చేసుకుంటే ఎవరినీ ఉపేక్షించేది లేదని స్పష్టం చేశారు. కన్నెధార లీజు వ్యవహారాన్ని పరిశీలిస్తానని ఆమె చెప్పారు. తనకు గనుల శాఖపై ఇంకా పట్టు రాలేదని, అవగాహనకు తాను ఇంకా రాలేదని ఆమె చెప్పారు.