వైయస్ జగన్ వర్గం ఎమ్మెల్యేల్లో అనర్హత వేటు భయం

హైదరాబాద్: మాజీ పార్లమెంటు సభ్యుడు వైయస్ జగన్ వర్గం శాసనసభ్యుల్లో గుబులు చోటు చేసుకుంది. అన్నింటికీ సిద్ధపడి జగన్ వైపు ఉంటున్న దాదాపు డజను మంది శాసనసభ్యులను పక్కన పెడితే మిగతా వారంతా భయపడుతున్నట్లు సమాచారం. తమపై అనర్హత వేటు పడుతుందేమోననే భయం వారిని చుట్టుముట్టినట్లు చెబుతున్నారు. కర్ణాటకలో ముఖ్యమంత్రి యడ్యూరప్పను వ్యతిరేకించిన శాసనసభ్యులపై అనర్హత వేటును న్యాయవ్యవస్థ నుంచి కూడా ఆమోదం లభించింది. అసమ్మతి శాసనసభ్యులపై అనర్హత వేటు వేయడం ద్వారానే యడ్యూరప్ప బలపరీక్షలో నెగ్గారు. అదే పద్ధతిని ముఖ్యమంత్రి కిరణ్ కుమార్ రెడ్డి తన అధికారాన్ని ఖాయం చేసుకోవాలని ఆలోచిస్తున్నారని వార్తలు వస్తుండడంతో కాంగ్రెసు శాసనసభ్యులు చాలా మంది జగన్ వైపు వెళ్లడానికి జంకుతున్నట్లు తెలుస్తోంది.

అనర్హత వేటు భయం పెట్టడంతో పాటు కిరణ్ కుమార్ రెడ్డి శాసనసభ్యులను బుజ్జగించే పనిని కూడా నిరంతరం కొనసాగిస్తున్నారు. ఈ రకంగా వైయస్ జగన్‌పై కిరణ్ కుమార్ రెడ్డి కొంత మేరకు పైచేయి సాధించినట్లు భావిస్తున్నారు. జగన్ వైపు వెళ్లాలని నిర్ణయించుకున్న కొర్ల భారతి, కుంజా సత్యవతి, రేగా కాంతారావు వంటి శాసనసభ్యులు తిరిగి వెనక్కి రావడానికి అదే కారణమని చెబుతున్నారు. మరింత మంది శాసనసభ్యులు కూడా జగన్ వైపు నుంచి తిరిగి కాంగ్రెసు వైపు వచ్చే అవకాశాలున్నాయని అంటున్నారు. అనర్హత వేటు నుంచి బయటపడాలనేదే వారి ప్రధాన ఉద్దేశంగా కనిపిస్తోంది. అనర్హత వేటు పడితే జగన్ పెట్టబోయే పార్టీ తరఫున పోటీ చేసి తిరిగి గెలిచే అవకాశాలపై సందేహాలతో కూడా ఇప్పుడే పదవులను వదులుకోవడానికి వారు సిద్ధంగా లేరని అంటున్నారు.