వైఎస్ వల్లే డిఎల్ రవీంద్రారెడ్డి గెలిచారు: జగన్ వర్గం నేత అంబటి

By Srinivas

Published: Thursday, February 17, 2011, 17:27 [IST]

హైదరాబాద్: దివంగత ముఖ్యమంత్రి వైఎస్ రాజశేఖరరెడ్డి దయవల్లనే వైద్య, ఆరోగ్యశాఖమంత్రి డిఎల్ రవీంద్రారెడ్డి గెలిచారని మాజీ పార్లమెంటు సభ్యుడు వైఎస్ జగన్మోహన్ రెడ్డి వర్గం నేత అంబటి రాంబాబు గురువారం అన్నారు. వైఎస్ సంక్షేమ పథకాల వల్లే కాంగ్రెస్ ప్రభుత్వం రెండోసారి అధికారంలోకి వచ్చిందని అన్నారు. ఆయన ప్రవేశ పెట్టిన పథకాలకు కిరణ్‌కుమార్ రెడ్డి ప్రభుత్వం తూట్లు పొడుస్తుందన్నారు. విద్యార్థుల ఫీజు రీయింబర్స్‌మెంట్స్ విడుదలకోసం జగన్ వారం రోజుల పాటు దీక్ష చేయనున్నారన్నారు. ఈ దీక్షకు ప్రభుత్వం అనుమతి ఇస్తుందని తాను భావిస్తున్నానని చెప్పారు.

ప్రజలు తమ న్యాయం కోసం ఇక ప్రజాపోరాటాలకు సిద్ధం కావాలని సూచించారు. చదువు కోసం ప్రభుత్వంపై ఒత్తిడి తేవాలన్నారు. ప్రభుత్వం బకాయిలు చెల్లించిన తర్వాతే జగన్ తన దీక్షను విరమిస్తారని చెప్పారు. కాగా అసెంబ్లీలోని మీడియా పాయింట్ వద్ద లోక్‌సత్తా అధ్యక్షుడు జయప్రకాశ్ నారాయణపై గురువారం తెలంగాణ రాష్ట్ర సమితి నేతలు చేసిన దాడిని ఆయన ఖండించారు. ఇది అప్రజాస్వామికం అన్నారు.

Published On February 17, 2011