లోక్‌సభలో ఏడ్చిన రాములమ్మ: ప్రణబ్‌కు చేతులెత్తి నమస్కారం

By Srinivas

Published: Thursday, March 3, 2011, 15:57 [IST]

న్యూఢిల్లీ: తెలంగాణ రాష్ట్ర సమితి పార్లమెంటు సభ్యురాలు విజయశాంతి లోక్‌సభలో గురువారం కన్నీళ్లు పెట్టుకున్నారు. కేంద్ర ప్రభుత్వం వెంటనే తెలంగాణకు అనుకూలంగా నిర్ణయం తీసుకోవాలని ఆమె సభలో కోరారు. తెలంగాణపై స్పీకర్ మీరాకుమార్ చర్చకు అనుమతి నిరాకరించడంతో అమె కన్నీళ్ల పర్యంతం అయ్యారు. కేంద్రమంత్రి ప్రణబ్ ముఖర్జీకి చేతులెత్తి నమస్కరించి నాలుగు కోట్లు తెలంగాణ ప్రజల చిరకాల కోరిక అయిన తెలంగాణకు అనుకూలంగా కాంగ్రెస్ నిర్ణయం తీసుకోవాలని కోరారు. కాగా ఉదయం నుండి లోక్‌సభలో గందరగోళం నెలకొనడంతో మీరాకుమార్ సభను శుక్రవారానికి వాయిదా వేశారు.

గురువారం తెలంగాణ నినాదాలతో లోక్‌సభ ఐదుసార్లు వాయిదా పడింది. టిఆర్ఎస్ ఎంపీలు కె చంద్రశేఖరరావు, విజయశాంతి పలుమార్లు తెలంగాణపై చర్చకు అనుమతి ఇవ్వాలని కోరుతూ పోడియం వద్దకు దూసుకు పోయారు. భారతీయ జనతా పార్టీ సీనియర్ నాయకులు ఎల్‌కె అద్వానీ, బిజెపి పార్లమెంటరీ నేత సుష్మాస్వరాజ్ తెలంగాణ వారికి మాట్లాడేందుకు అవకాశం ఇవ్వాలని డిమాండ్ చేశారు. తెలంగాణ వాదులకు మద్దతుగా మాట్లాడారు. పార్లమెంటులో తెలంగాణ బిల్లు పెడితే ఎన్డీయే మద్దతు ఇస్తుందని ప్రకటించారు.

Published On March 3, 2011