నాగం వ్యాఖ్యలతో చిక్కుల్లో బాబు: మరోసారి మీడియా ముందుకు మోత్కుపల్లి

హైదరాబాద్: అసెంబ్లీలో మీడియా పాయింట్ వద్ద తెలుగుదేశం పార్టీ ఎమ్మెల్యే నాగం జనార్ధన్‌ రెడ్డి మాటలతో చిక్కుల్లో పడ్డ టిడిపి అధ్యక్షుడు చంద్రబాబుకు మద్దతుగా మోత్కుపల్లి టీం మరోసారి మీడియా ముందుకు వచ్చింది. ఈ సందర్భంగా వారు విలేకరులతో మాట్లాడారు. కొంతమంది వ్యక్తులు వ్యక్తిగత ఎజెండాతో ముందుకు వెళ్లడానికి ప్రయత్నాలు చేస్తున్నారని యువ ఎమ్మెల్యే రేవంత్‌రెడ్డి ధ్వజమెత్తారు. మమ్మల్ని తెలంగాణ ప్రజల దృష్టిలో దోషులుగా నిలబెట్టి తాను హీరో అవుదామనే ఉద్దేశ్యంతో ఇలాంటి రాజకీయాలు చేస్తున్నారన్నారు. భారతీయ జనతా పార్టీ రాష్ట్ర అధ్యక్షుడు కిషన్ రెడ్డి తెలంగాణ కోసం నాడు తోటి ఎమ్మెల్యే లక్ష్మీనారాయణతోపాటు ఎందుకు రాజీనామా చేయలేదని ప్రశ్నించాడు. అలాంటి కిషన్‌రెడ్డి ఇప్పుడు నాగంకు మద్దతు ప్రకటిస్తామని చెప్పడం విడ్డూరమన్నారు. నాగంపై చర్యలు పార్టీ నిర్ణయించి తీసుకుంటుందని చెప్పారు. కిషన్‌రెడ్డి రాజీనామా చేసి చిత్తశుద్ధి నిరూపించుకోవాలన్నారు. చంద్రబాబు చెబితేనే నాగంను ఫోరం చైర్మన్‌గా ఎన్నుకున్నామన్నారు.

తెలంగాణవాదానికి, తెలంగాణ తేవడానికి, తెలంగాణ ప్రజల గౌరవాన్ని కాపాడటానికి తెలుగుదేశం పార్టీ పూర్తిగా కట్టుబడి ఉందని మోత్కుపల్లి నరసింహులు అన్నారు. ఎవరో చెబితే మేం వినడానికి సిద్ధంగా లేమన్నారు. పార్లమెంటులో తెలంగాణ బిల్లు పెట్టే వరకు మేం పోరాడం చేస్తామని చెప్పారు. నాగం జనార్ధన్ రెడ్డి తనకు తాను గొప్పలు చెప్పుకుంటున్నారన్నారు. అందరి అభిప్రాయమే తన అభిప్రాయమని చెబుతూ తన సొంత పంథాలో వెళుతున్నారన్నారు. మాట చెప్పకుండా, విషయాలు మాతో చర్చించకుండా ద్రోహం చేస్తున్నారన్నారు. నాగం పద్ధతిని ప్రజలు గమనిస్తున్నారన్నారు. మమ్మల్ని ఇబ్బుందులు పెట్టే విధంగా జనార్ధన్ రెడ్డి వెళుతున్నారన్నారు. తెలంగాణకు మిగతా ఎమ్మెల్యేలు కట్టుబడి లేరనే భావన కల్పించడానికే నాగం ఇలాంటి రాజకీయాలు చేస్తున్నారన్నారు.

కానీ టిడిపి తెలంగాణకు కట్టుబడి ఉందని చెప్పారు. నాగం తెలంగాణ ప్రజల మనోభావాలను దెబ్బతీసేలా మాట్లాడుతున్నారన్నారు. తెలంగాణ కోసం 600 మంది విద్యార్థులు మరణించారన్నారు. తెలంగాణ ప్రజల గౌరవాన్ని ఏఐసిసి అధ్యక్షురాలు సోనియాగాంధీ గౌరవించాలన్నారు. వెంటనే పార్లమెంటులో తెలంగాణ బిల్లు పెట్టాలని డిమాండ్ చేశారు. కాగా తెలంగాణ కోసం టిడిపి తెలంగాణ ఎమ్మెల్యేలు రాజీనామాకు కట్టుబడి ఉన్నారన్నారు. మా రాజీనామాలు తెలంగాణ పోలిటికల్ జెఏసి కన్వీనర్ కోదండరాం వద్దనే ఉన్నాయని మరో ఎమ్మెల్యే అన్నారు. మళ్లీ రాజీనామాలు రాసివ్వడానికి కూడా సిద్ధమని చెప్పారు.