ఫలించని కిరణ్ కుమార్ దౌత్యం, అసెంబ్లీకి రాబోమన్న తెలంగాణ ఎమ్మెల్యేలు

By Pratap

Published: Wednesday, March 9, 2011, 12:08 [IST]

హైదరాబాద్‌: కాంగ్రెసు తెలంగాణ ప్రాంత శాసనసభ్యులను బుజ్జగించడానికి ముఖ్యమంత్రి కిరణ్ కుమార్ రెడ్డి చేసిన ప్రయత్నాలు ఫలించడం లేదు. శాసనసభకు హాజరయ్యేలా తెలంగాణ ప్రాంత శాసనసభ్యులను ఒప్పించాలని ఆయన తెలంగాణ మంత్రులకు సూచించారు. దీంతో మంత్రులు గీతా రెడ్డి, బస్వరాజు సారయ్య రంగంలోకి దిగారు. అయితే, వారి ప్రయత్నాలు ఫలించలేదు. మంత్రుల ఢిల్లీ పర్యటన తర్వాతే సభకు హాజరయ్యే అంశంపై తాము నిర్ణయం తీసుకుంటామని తెలంగాణ ఎమ్మెల్యేలు తేల్చిచెప్పారు. హాజరుకాకపోయినా శాసనసభకు అందుబాటులోనే ఉంటామంటూ హామీ ఇచ్చారు. బుధవారం సీఎల్పీ కార్యాలయంలో మంత్రులు గీతారెడ్డి, బస్వరాజు సారయ్య తెలంగాణ కాంగ్రెస్‌ ఎమ్మెల్యేలతో భేటీ అయ్యారు. అసెంబ్లీ సమావేశాలకు హాజరు కావాలని మంత్రులు ఎమ్మెల్యేలను కోరగా వారు ఆ విధంగా స్పందించారు.

తెలంగాణ రాష్ట్ర ఏర్పాటుపై స్పష్టమైన ప్రకటన చేయాలని శాసనసభ సమావేశాలను కాంగ్రెసు తెలంగాణ ప్రాంత శాసనసభ్యులు బహిష్కరించారు. వారి బాటలోనే తెలుగుదేశం తెలంగాణ ప్రాంత శాసనసభ్యులు కూడా నడుస్తున్నారు. తెలంగాణ రాష్ట్ర సమితి (తెరాస) సభ్యులు కూడా సభకు హాజరు కావడం లేదు. దీంతో తెలంగాణకు చెందిన మెజారిటీ సభ్యులు లేకుండా సమావేశాలు జరుగుతున్నాయి. ఈ నేపథ్యంలో కాంగ్రెసు తెలంగాణ ప్రాంత శాసనసభ్యులు సభకు హాజరయ్యేలా చూడాలని ముఖ్యమంత్రి తెలంగాణ మంత్రులను కోరారు.

కాగా, తెలంగాణ అంశంపై ఈ నెల 12వ తేదీ లోగా తేల్చాలని తెలంగాణ ప్రాంత మంత్రులు కూడా అధిష్టానాన్ని కోరుతున్నారు. ఈలోగా ఢిల్లీకి వెళ్లి ఏదో ఒకటి తేల్చుకోవాలని వారు భావిస్తున్నారు. దాంతో తెలంగాణ మంత్రులు ఢిల్లీకి వెళ్లి ఏదో ఒకటి తేల్చిన తర్వాతనే తాము సభకు హాజరయ్యేదీ లేనిదీ చెబుతామని కాంగ్రెసు తెలంగాణ ప్రాంత శాసనసభ్యులు మంత్రులతో తేల్చి చెప్పారు.

Published On March 9, 2011