జగన్‌కు మరో దెబ్బ, వైయస్ భూముల కేటాయింపులపై రివ్యూ

By Pratap

Published: Monday, March 21, 2011, 16:17 [IST]

హైదరాబాద్: వైయస్సార్ కాంగ్రెసు పార్టీ నాయకుడు, మాజీ పార్లమెంటు సభ్యుడు వైయస్ జగన్‌ను అదుపు చేసేందుకు ముఖ్యమంత్రి కిరణ్ కుమార్ రెడ్డి ప్రభుత్వం మరో చర్యకు పూనుకుంటోంది. దివంగత నేత వైయస్ రాజశేఖర రెడ్డి ప్రభుత్వ హయాంలో జరిగిన భూకేటాయింపులపై సమీక్ష జరపాలని నిర్ణయించింది. అయితే, భూకేటాయింపులపై సభా సంఘం వేయాలని తెలుగుదేశం పార్టీ డిమాండ్ చేస్తోంది. వైయస్ జగన్‌పై దాడిలో భాగంగానే తెలుగుదేశం ఆ డిమాండ్ చేస్తోంది. అయితే, సభా సంఘానికి ప్రభుత్వం అంగీకరించడం లేదు. భూముల కేటాయింపులను సమీక్షించి, అవసరమైతే తిరిగి స్వాధీనం చేసుకునే ఉద్దేశంతో ప్రభుత్వం ఉంది. ప్రత్యేక ఆర్థిక మండళ్ల (సెజ్) పేరుతో జరిగిన భూ కేటాయింపులపై ప్రధానంగా ప్రభుత్వం దృష్టి సారించింది.

వైయస్ రాజశేఖర రెడ్డి ప్రభుత్వ హయాంలో దేశంలోనే ఎక్కడా లేనంతగా సెజ్‌లకు అనుమతి ఇచ్చారు. సెజ్‌ల కోసం వివిధ సంస్థలకు భారీగా భూముల కేటాయింపు జరిగింది. దేశంలో అత్యధికంగా ఆంధ్రప్రదేశ్ రాష్ట్రంలోనే సెజ్‌లకు అనుమతి లభించింది. ఒక్క రంగారెడ్డి జిల్లాలోనే 42 సెజ్‌లకు అనుమతి ఇచ్చినట్లు తెలుస్తోంది. రంగారెడ్డి జిల్లాలోని భూముల విలువ చుక్కలు దాటుతండడంతో ఆ కేటాయింపులు ఎక్కువగా జరిగినట్లు తెలుస్తోంది.

సెజ్‌లకు కేటాయించిన భూముల్లో కొంత భాగాన్ని రియల్ ఎస్టేట్ వ్యాపారం చేసుకోవడానికి కూడా వైయస్ ప్రభుత్వం అనుమతిచ్చింది. దీంతో భూములు పొందిన సంస్థల ద్వారా వైయస్ జగన్ భారీగా లాభం పొందారనేది ప్రధాన ఆరోపణ. వీటి మూలంగానే జగన్ సంస్థల్లోకి ఆయా సంస్థల పెట్టుబడులు వచ్చి చేరాయని అంటున్నారు. దీంతో జగన్ సంస్థలను కట్టడి చేయడానికి సెజ్‌లకు కేటాయించిన భూములను సమీక్షించి, తిరిగి స్వాధీన పరుచుకోవడం ద్వారా జగన్ ఆర్థిక మూలాలను దెబ్బ తీయవచ్చుననేది కిరణ్ కుమార్ రెడ్డి ఆలోచనగా తెలుస్తోంది.

Published On March 21, 2011