విద్యార్థిని కాల్చి చంపిన మణిపూర్ మంత్రి తనయుడు

ఇంఫాల్ : మణిపూర్ రాష్ట్ర మంత్రి తనయుడు 21 ఏళ్ల విద్యార్థిని కాల్చి చంపాడు. ఈ సంఘటన ఆదివారం సాయంత్రం చోటు చేసుకుంది. మణిపూర్ నీటిపారుదల, వరద నియంత్రణ, క్రీడా శాఖల మంత్రి ఎన్. బీరేన్ సింగ్ 27 ఏళ్ల కుమారుడు అజయ్ మీటేయి ఇరోమ్ రోజర్ అనే విద్యార్థిని క్వాకీథేల్ ప్రాంతంలో కాల్పి చంపాడు.

రోజర్‌ను అజయ్ వాహనంలో వెంటాడి ఎం 20 పిస్టల్‌తో కాల్చి చంపి, పోలీసులకు లొంగిపోయినట్లు చెబుతున్నారు. వ్యక్తిగత శత్రుత్వం వల్లనే అతను ఈ పనికి పూనుకున్నట్లు పోలీసులు భావిస్తున్నారు. హంతకుడిపై వెంటనే చర్యలు తీసుకోవాలని కోరడానికి రోజర్ నివసిస్తున్న ప్రాంతానికి చెందిన వందలాది మంది ముఖ్యమంత్రి నివాసానికి ఊరేగింపుగా వెళ్లారు.