తెలంగాణ, సీమాంధ్ర చిచ్చుకు సోనియానే కారణం: దేవినేని ఉమ

By Srinivas

Published: Tuesday, March 22, 2011, 15:31 [IST]

హైదరాబాద్: ప్రశాంతంగా ఉన్న రాష్ట్రంలో తెలంగాణ, సీమాంధ్ర ప్రజలలో మధ్య చిచ్చు పెట్టింది ఏఐసిసి అధ్యక్షురాలు సోనియాగాంధీ, కేంద్రమంత్రులు చిదంబరం, ప్రణబు ముఖర్జీయేనని తెలుగుదేశం పార్టీ సీనియర్ ఎమ్మెల్యే దేవినేని ఉమా మహేశ్వరరావు మంగళవారం అసెంబ్లీ మీడియా పాయింట్ వద్ద మాట్లాడుతూ విమర్శించారు. సభ వాయిదా అనంతరం సీమాంధ్ర ఎమ్మెల్యేలు మీడియా ప్రతినిధులతో మాట్లాడారు. ప్రజల మధ్య చిచ్చుపెట్టింది కాంగ్రెస్ పార్టీయే అన్నారు.

గత డిసెంబర్‌లో కేంద్ర ప్రభుత్వం డిసెంబర్ 9న తెలంగాణ రాష్ట్ర ప్రక్రియ ప్రారంభమవుతుందని, ఆ తర్వాత 23న సమైక్యాంధ్రకు మొగ్గు చూపుతూ అస్పష్ట ప్రకటనలు చేయడంతో రాష్ట్రంలో పరిస్థితి ఇలా తయారయిందన్నారు. కేంద్ర ప్రభుత్వం త్వరలో పార్లమెంటులో తెలంగాణ బిల్లు పెడుతుందని, జూన్‌లో తెలంగాణ వస్తుందని కొన్ని వాదనలు వినిపిస్తున్నాయన్నారు. దీనిపై సీమాంధ్ర కాంగ్రెసు ప్రజాప్రతినిధులు సమాధానం చెప్పాలన్నారు. సమైక్యాంధ్రను కోరుకునే సీమాంధ్ర ప్రజాప్రతినిధులుగా అందరూ దీనిపై స్పందించాలన్నారు. కాగా టిడిపి తెలంగాణ ప్రజాప్రతినిధుల తీరుపై ప్రశ్నించగా ఏ ప్రాంత ప్రజాప్రతినిధులు ఆ ప్రాంత ప్రజల ఆకాంక్షలకు అనుగుణంగా పని చేస్తున్నారని చెప్పారు.

Published On March 22, 2011