కడప అభ్యర్థి: కందులపై డిఎస్, కిరణ్ కుమార్ రెడ్డి మధ్య విభేదాలు

By Pratap

Published: Wednesday, April 6, 2011, 14:34 [IST]

హైదరాబాద్: కడప లోకసభ అభ్యర్థి ఖరారు విషయంలో ముఖ్యమంత్రి కిరణ్ కుమార్ రెడ్డికి, ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ మధ్య విభేదాలు చోటు చేసుకున్నాయి. వీరిద్దరు బుధవారం ఉదయం కడప జిల్లా పార్టీ నాయకులతో సుదీర్ఘంగా చర్చలు జరిపారు. ఈ చర్చలు కొలిక్కి రాకపోవడంతో సమావేశం సాయంత్రానికి వాయిదా పడింది. అయితే, అభ్యర్థి ఖరారు బాధ్యతను తాము ముఖ్యమంత్రి కిరణ్ కుమార్ రెడ్డికి, పిసిసి అధ్యక్షుడు డి. శ్రీనివాస్‌కు అప్పగించామని కడప జిల్లాకు చెందిన పిసిసి అధికార ప్రతినిధి తులసిరెడ్డి మీడియా ప్రతినిధులతో చెప్పారు. తాము చెప్పాల్సింది చెప్పామని, అభ్యర్థిని నిర్ణయించాల్సింది వారేనని ఆయన అన్నారు.

కాగా, తెలుగుదేశం పార్టీకి రాజీనామా చేసి పార్టీలోకి రావడానికి సిద్ధంగా ఉన్న కందుల రాజమోహన్ రెడ్డికి కడప లోకసభ సీటు ఇవ్వాలని ముఖ్యమంత్రి కిరణ్ కుమార్ రెడ్డి అభిప్రాయపడుతున్నారు. రాజమోహన్ రెడ్డితో పాటు ఆయన సోదరుడు కందుల శివానంద రెడ్డి కాంగ్రెసు పార్టీలో చేరడానికి రంగం సిద్ధమైనట్లు తెలుస్తోంది. అయితే, తెలుగుదేశం నుంచి వచ్చిన వెంటనే కందుల రాజమోహన్ రెడ్డికి టికెట్ ఇస్తే తప్పుడు సంకేతాలు వస్తాయని డి. శ్రీనివాస్ వాదిస్తున్నట్లు తెలుస్తోంది. ఆ రకంగా కందుల రాజమోహన్ రెడ్డికి టికెట్ ఇవ్వాలనే ముఖ్యమంత్రి అభిప్రాయంతో ఆయన విభేదిస్తున్నట్లు తెలుస్తోంది. దాదాపుగా కందుల రాజమోహన్ రెడ్డి కడప లోకసభ స్థానంలో కాంగ్రెసు అభ్యర్థిగా పోటీ చేసే అవకాశాలున్నట్లు తెలుస్తోంది.

Published On April 6, 2011