డిఎల్ రవీంద్రా రెడ్డికి వైయస్ జగన్‌పై కడపలో పోటీ తప్పదా?

హైదరాబాద్: కడప లోకసభ స్థానంలో పోటీ చేసే విషయంలో కాంగ్రెసు పార్టీ అధిష్టానం చివరకు రాష్ట్ర మంత్రి డిఎల్ రవీంద్రా రెడ్డికే గంట కట్టే అవకాశాలున్నట్లు ప్రచారం జరుగుతోంది. కడప జిల్లా కాంగ్రెసు శాసనసభ్యుడు వీరశివా రెడ్డి మాటలు కూడా ఇదే విషయాన్ని తెలియజేస్తున్నాయి. కడప లోకసభ స్థానంలో వైయస్ జగన్‌పై డిఎల్ రవీంద్రా రెడ్డి పోటీ చేయాల్సిన అనివార్య స్థితిలో పడినట్లే కనిపిస్తున్నారు. రవీంద్రా రెడ్డి పేరునే పార్టీ అధిష్టానం ఖరారు చేసిందని, రవీంద్రా రెడ్డి ఈ నెల 18వ తేదీన నామినేషన్ వేస్తారని వీరశివా రెడ్డి చెప్పారు.

తెలుగుదేశం నుంచి కాంగ్రెసులోకి వచ్చిన కందుల రాజమోహన్ రెడ్డి జగన్‌పై పోటీ చేయడానికి నిరాకరిస్తున్నారు. కాంగ్రెసులో చేరినప్పటికీ పోటీకి మాత్రం విముఖత వ్యక్తం చేస్తున్నారు. కందుల శివానంద రెడ్డిని పోటీకి దించాలని ముఖ్యమంత్రి కిరణ్ కుమార్ రెడ్డి ఆలోచన చేస్తున్నారు. అయితే, కందుల శివానంద రెడ్డి కూడా సుముఖంగా లేనట్లు తెలుస్తోంది. పోటీ చేయవద్దని కందుల బ్రదర్స్ కుమారులు, బంధువులు వారికి చెబుతున్నట్లు తెలుస్తోంది. ఈ స్థితిలో డిఎల్ రవీంద్రారెడ్డి పోటీకి దిగక తప్పదనే మాట వినిపిస్తోంది. మొదటి నుంచీ వైయస్ జగన్‌ను రవీంద్రా రెడ్డి ఎదుర్కుంటున్నారు.

English summary

It is learnt that DL Ravindra Reddy's name may be finalised for Kadapa loksabha seat by Congress high command. As Kandula Rajamohan Reddy is not interested, DL Ravindra Reddy's name is finalised.