విమర్శలు ఆ వెనుకే చేయి చేయి కలిపారు!: కృష్ణాలో లగడపాటి, సర్వేల తీరు

By Srinivas

Published: Sunday, April 10, 2011, 14:58 [IST]

విజయవాడ: సిద్దిపేట పార్లమెటు సభ్యుడు సర్వే సత్యనారాయణ, విజయవాడ ఎంపీ లగడపాటి రాజగోపాల్ ఆదివారం ముందుగా విలేకరుల సమావేశంలో విమర్శలు చేసుకున్నారు. ఆ తర్వాత మాజీ మంత్రి కోనేరు రంగారావు విగ్రహావిష్కరణకు ఒకరి భుజంపై ఒకరు చేయి వేసుకొని వెళ్లారు. ఆదివారం కోనేరు విగ్రహావిష్కరణ కార్యక్రమానికి ముందు సర్వే మీడియాతో మాట్లాడుతూ లగడపాటిపై ధ్వజమెత్తారు. ఆ తర్వాత విగ్రహావిష్కరణకు చేయి చేయి కలుపుకుని వెళ్లారు.

లగడపాటి సమైక్యాంధ్ర అంటూ స్జేజి డ్రామాలు నడపడం సరికాదని అంతకుముందు సర్వే మీడియాతో మాట్లాడుతూ అన్నారు. లగడపాటి అంటే జగడపాటి అని అనిపించుకోవద్దని సూచించారు. తాను వివాదాలకు వ్యతిరేకం అన్నారు. జాగో తెలంగాణ బాగో ఆంధ్రావాలా వంటి నినాదాలకు తాను దూరం అన్నారు. తెలంగాణలో కూడా ఆంధ్రావాళ్లు సంతోషంగా ఉండాలన్నారు.

కాకాని స్ఫూర్తితో తీసుకొని లగడపాటి సీమాంధ్ర ప్రత్యేక రాష్ట్రానికి నడుం బిగించాలని కోరారు. అప్పుడు ఆయనకు ఇరుప్రాంతాల ప్రజల మద్దతు ఉంటుందన్నారు. సీమాంధ్రకు లగడపాటి కంకణం కట్టుకోవాలని సూచించారు. కాగా తన వద్దకు కొత్త పంచాయతీలు తేవద్దని లగడపాటి వ్యాఖ్యానించారు.

Published On April 10, 2011