వైయస్ జగన్‌కు షాక్: డిఎల్ రవీంద్రా రెడ్డితో బద్వేలు ఎమ్మెల్యే కమలమ్మ భేటీ

కడప: కడప జిల్లాలో వైయస్సార్ కాంగ్రెసు పార్టీ నేత వైయస్ జగన్‌కు షాక్ తగిలింది. జగన్‌ను మొదటి నుంచి గట్టిగా సమర్థిస్తూ వస్తున్న బద్వేలు శాసనసభ్యురాలు కమలమ్మ కాంగ్రెసు గూటికి చేరేందుకు సిద్ధపడ్డారు. జగన్ వర్గానికి చెందిన తోటి ఎమ్మెల్యే ఒకరితో కమలమ్మకు విభేదాలు తలెత్తినట్లు కొద్ది రోజుల క్రితం జరిగింది. దాంతో ఆమె తీవ్ర అసంతృప్తికి గురై తన మాతృ సంస్థ కాంగ్రెసు వైపు తిరిగి రావడానికి సిద్ధపడినట్లు కూడా వార్తలు వచ్చాయి. ఆమె బుజ్జగించడానికి వైయస్ జగన్ వర్గం తీవ్రంగా ప్రయత్నాలు చేసింది. అయితే ఆ ప్రయత్నాలు ఫలించినట్లు లేవు.

కమలమ్మ మంగళవారం కడప జిల్లా కాంగ్రెసు కమిటీ (డిసిసి) కార్యాలయానికి వచ్చారు. రాష్ట్ర మంత్రి అహ్మదుల్లా, కడప పార్లమెంటు కాంగ్రెసు అభ్యర్థి డిఎల్ రవీంద్రా రెడ్డిలతో ఆమె సమావేశమయ్యారు. ఆమె కాంగ్రెసులోకి తిరిగి వచ్చి డిఎల్ రవీంద్రా రెడ్డి కోసం పనిచేసే అవకాశాలున్నాయి. కమలమ్మ తప్పుకోవడం వల్ల వైయస్ జగన్‌కు ఏదో మేరకు నష్టం జరుగుతుందని అంటున్నారు. మరి కొంత మంది జగన్ వర్గం శాసనసభ్యులు తమ వైపు వస్తారని డిఎల్ రవీంద్రా రెడ్డి ఆశాభావం వ్యక్తం చేశారు. మంత్రి పదవికి రాజీనామా చేయకుండానే తాను కడప నుంచి లోకసభకు పోటీ చేస్తున్నట్లు ఆయన మంగళవారం మీడియా ప్రతినిధులతో చెప్పారు.

English summary

It is learnt that Badvel MLA Kamalamma parted away from YS Jagan's YSR Congress party. She met ministers DL Ravindra Reddy and ahmafullah in Kadapa DCC office.