వారసత్వ పోరు మీడియా సృష్టి, వివాదం వారే పరిష్కరించాలి: బాలకృష్ణ

హైదరాబాద్: తెలుగుదేశం పార్టీలో ఎలాంటి వారసత్వ పోరు లేదని అదంతా మీడియా సృష్టేనని తెలుగు టాప్ హీరో నందమూరి బాలకృష్ణ బుధవారం విలేకరులతో మాట్లాడుతూ చెప్పారు. తెలుగుదేశం పార్టీ అధ్యక్షుడు చంద్రబాబునాయుడు 62వ పుట్టిన రోజు సందర్భంగా బాలయ్య బాబు ఇంటికి వెళ్లి శుభాకాంక్షలు తెలిపారు. ఈ సందర్భంగా ఆయన విలేకరులు అడిగిన ప్రశ్నలకు నవ్వుతూ సమాధానాలు చెప్పారు. టిడిపిలో ఎలాంటి వారసత్వ పోరు లేదన్నారు. వారసత్వ పోరు మీడియానే సృష్టించిందని కాబట్టి దానికి ముగింపు పలకాల్సింది కూడా మీడియానే అని అన్నారు.

చంద్రబాబు నాయకత్వంలో టిడిపి మళ్లీ అధికారంలోకి రావాలని తాను కోరుకుంటున్నానని చెప్పారు. చంద్రబాబు నాయకత్వంలో రాష్ట్రానికి న్యాయం జరగాలని కోరుకుంటున్నట్టు చెప్పారు. మరోసారి చంద్రబాబు సిఎం కావాలని తాను ఆశిస్తున్నట్టు చెప్పారు. కాగా విజయవాడ టిడిపిలో విభేదాలు సద్దుమణిగినట్లుగా కనిపించడం లేదు. బుధవారం భవానీపురంలో జరిగిన చంద్రబాబు జన్మదిన వేడుకలకు దేవినేని ఉమ, వల్లభనేని వంశీ ఇద్దరూ మొదటి సారి ఒకే వేదికపై పాలు పంచుకుంటారని టిడిపి కార్యకర్తలు భావించారు. కానీ వంశీ మాత్రం వ్యక్తిగత పని ఒత్తిడి కారణంగా రాలేక పోతున్నట్టుగా చెప్పారు.