చంద్రబాబు కాంగ్రెసులోకి రావాల్సిందే, కుటుంబంలో విభేదాలు: చిరంజీవి

కడప: తెలుగుదేశం పార్టీ అధ్యక్షుడు నారా చంద్రబాబు నాయుడిపై ప్రజారాజ్యం పార్టీ అధ్యక్షుడు చిరంజీవి సంచలన వ్యాఖ్యలు చేశారు. కాంగ్రెసు పార్టీ అభ్యర్థుల కోసం ఆయన శుక్రవారం కడప, పులివెందుల స్థానాల్లో రోడ్ షో నిర్వహించారు. ఈ రోడ్ షోల్లో చంద్రబాబుపై, వైయస్సార్ కాంగ్రెసు పార్టీ నాయకుడు వైయస్ జగన్‌పై తీవ్ర వ్యాఖ్యలు చేశారు. తనలో 30 శాతం కాంగ్రెసు రక్తం ఉన్న చంద్రబాబు కాంగ్రెసులోకి వచ్చినా రావచ్చునని ఆయన అన్నారు. తెలుగుదేశం పార్టీలో ఎన్టీఆర్ కుటుంబ సభ్యులు ఆధిపత్యం సంపాదిస్తే చంద్రబాబు తన సొంత గూడు కాంగ్రెసులోకి రావాల్సిందేనని ఆయన అన్నారు. చంద్రబాబు కుటుంబంలో విభేదాలు తారాస్థాయిలో ఉన్నాయని ఆయన అన్నారు.

జగన్ అధికార దాహం రాష్ట్ర పాలన వ్యవస్థను అస్తవ్యస్తం చేసిందని చిరంజీవి అన్నారు. ఆ వ్యక్తి స్వార్థం, అధికార దాహమే ఉపఎన్నికలకు కారణమయిందన్నారు. కడప జిల్లా కమలాపురం నియోజకవర్గంలోని నంది మండలంలో చిరంజీవి పర్యటించారు. ముఖ్యమంత్రి పదవి వంశపారంపర్యంగా వస్తున్న జాగీరు కాదని జగన్‌పై ఆయన మండిపడ్డారు. తెలుగుదేశం పార్టీ అధినేత చంద్రబాబు నాయుడు 2 ఎకరాల పొలం నుంచి 2వేల ఎకరాలు ఎలా సంపాదించారని ఆయన ప్రశ్నించారు.

అన్నా హజారే అవినీతిపై పోరాడుతున్న మహాయోధుడని కొనియాడారు. ఆయన పోరాటం ప్రారంభించి 24 గంటలు గడవకముందే అందరూ ఆయనకు మద్దతు పలకడం సంతోషించదగ్గ విషయం అన్నారు. అవినీతి పరులైన చంద్రబాబు, జగన్‌ ఆయనకు మద్దతు తెలపడం కంటే పెద్ద జోక్‌ లేదని చిరు విమర్శించారు.