కాంగ్రెసు, టిడిపి ఎమ్మెల్యేలే కోదండరామ్ లక్ష్యం: ఉద్యమ కార్యాచరణ కూర్పు

By Srinivas

Published: Wednesday, May 4, 2011, 16:21 [IST]

హైదరాబాద్: కాంగ్రెసు, తెలుగుదేశం పార్టీ నేతలే లక్ష్యంగా తెలంగాణ పొలిటికల్ జాయింట్ యాక్షన్ కమిటీ చైర్మన్ ప్రొఫెసర్ కోదండరామ్ ఉద్యమ కార్యాచరణ రూపొందిస్తున్నట్టుగా తెలుస్తోంది. టిడిపి, కాంగ్రెసుకు చెందిన ప్రజాప్రతినిధులు తెలంగాణ ఉద్యమంలో ప్రధాన పాత్ర పోషించే దిశలో ప్రేరేపించడానికి వారి ఇళ్ల ముందు ఆందోళనలు చేపట్టాలని నిర్ణయించుకున్నట్లుగా తెలుస్తోంది. బుధవారం విలేకరులతో మాట్లాడిన కోదండరామ్ ఉద్యమ కార్యాచరణ రూపొందుతోందని చెప్పారు. ఉద్యమంలో చురుగ్గా పాల్గొనని పార్టీల నేతలపై ఒత్తిడి తెచ్చే విధంగా కార్యాచరణ రూపొందిస్తున్నట్టు చెప్పారు.

ముసాయిదా సిద్ధం అయిందని చెప్పారు. శనివారం స్టీరింగ్ కమిటీ సమావేశంలో చర్చించిన తర్వాత తుది నిర్ణయం తీసుకుంటామని చెప్పారు. తెలంగాణ ఉద్యమానికి కలిసి వచ్చే అందరిని సమన్వయ పరుచుకుంటూ ముందుకు వెళతామని స్పష్టం చేశారు. తెలుగుదేశం పార్టీ ఎమ్మెల్యే నాగం జనార్ధన్ రెడ్డి ఈ నెల 8న మహబూబ్‌నగర్‌లో ఏర్పరిచే సమావేశానికి ఆహ్వానం అందిందని చెప్పారు. దానిపై కూడా సమావేశంలో చర్చించి నిర్ణయం తీసుకుంటామని చెప్పారు.

Published On May 4, 2011