కోమటిరెడ్డి సోదరులు వైయస్ జగన్ కోవర్టులు: పాల్వాయి గోవర్దన్ రెడ్డి

By Srinivas

Published: Thursday, May 19, 2011, 15:58 [IST]

హైదరాబాద్: నల్గొండ జిల్లాకు చెందిన మంత్రి కోమటిరెడ్డి వెంకట్ రెడ్డి, పార్లమెంటు సభ్యుడు కోమటిరెడ్డి రాజగోపాల్ రెడ్డిపై కాంగ్రెసు పార్టీ సీనియర్ నాయకుడు పాల్వాయి గోవర్దన్ రెడ్డి తీవ్రస్థాయిలో ధ్వజమెత్తారు. తెలంగాణలో కోమటిరెడ్డి సోదరులు వైయస్ఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డికి కోవర్టులుగా పని చేస్తున్నారని ఆరోపించారు. వారు ఓ వైపు జగన్‌ను అభిమానిస్తూ ముఖ్యమంత్రి కిరణ్ కుమార్ రెడ్డి మంత్రివర్గంలో కొనసాగుతున్నారని అన్నారు.

ఇలా జగన్ కోవర్టులుగా ఉంటూ కిరణ్ మంత్రివర్గంలో కొనసాగుతుండటం వల్ల కాంగ్రెసు పార్టీ పరిస్థితి బావుండదని తాను కేంద్ర మంత్రి, రాష్ట్ర వ్యవహారాల ఇంఛార్జ్ గులాం నబీ ఆజాద్‌కు వివరించినట్లు చెప్పారు. కేంద్రం వెంటనే తెలంగాణ ప్రకటించాలని ఆయన కోరారు. తెలంగాణకు సానుకూలంగా ప్రకటన రాకపోయినా, జాప్యం జరిగినా తెలంగాణలో పార్టీ బతకదని కూడా తాను చెప్పినట్టు వివరించారు.

Published On May 19, 2011