చంద్రబాబుపై నిప్పులు చెరిగిన జగన్, కాంగ్రెసుతో కుమ్మక్కని ఆరోపణ

కడప: తెలుగుదేశం పార్టీ అధ్యక్షుడు నారా చంద్రబాబు నాయుడిపై వైయస్సార్ కాంగ్రెసు పార్టీ అధ్యక్షుడు వైయస్ జగన్ మరోసారి నిప్పులు చెరిగారు. చంద్రబాబునాయుడు కాంగ్రెసుతో కుమ్మక్కయ్యారని ఆయన ఆరోపించారు. ఆయన శుక్రవారంనాడు కడప జిల్లాలోని పులివెందుల శాసనసభా నియోజకవర్గంలోని పలు గ్రామాల్లో పర్యటించారు. ఈ సందర్భంగా ప్రజలను ఉద్దేశించి ప్రసంగించారు. ప్రజల తరఫున పోరాటం చేయాల్సిన ప్రతిపక్ష తెలుగుదేశం పార్టీ ఆ విషయం మర్చిపోయి కాంగ్రెసుతో కుమ్మక్కయిందని ఆయన అన్నారు. రాష్ట్రంలో ప్రతిపక్షం లేకుండా పోయిందని, వైయస్సార్ కాంగ్రెసు పార్టీ మాత్రమే ప్రతిపక్ష పాత్ర పోషిస్తోందని ఆయన అన్నారు.

చంద్రబాబు నాయుడు 47 మంది శానససభ్యులతో 2004లో వైయస్ రాజశేఖర రెడ్డి ప్రభుత్వంపై అవిశ్వాస తీర్మానం ప్రతిపాదించారని, ఇప్పుడు 90 మంది శానససభ్యులున్నా అవిశ్వాస తీర్మానం ప్రతిపాదించడానికి ముందుకు రావడం లేదని, ఇదే కాంగ్రెసుతో చంద్రబాబు కుమ్మక్కయ్యారని చెప్పడానికి నిదర్శనమని ఆయన అన్నారు. ప్రజల సమస్యలపై చంద్రబాబు మొసలి కన్నీరు కారుస్తున్నారని ఆయన దుయ్యబట్టారు. ప్రజా సమస్యలు పట్టని ప్రస్తుత ప్రభుత్వాన్ని బంగాళాఖాతంలో కలపాలని ఆయన అన్నారు. ప్రభుత్వంపై ప్రజలు తీవ్ర ఆగ్రహంతో ఉన్నారని ఆయన అన్నారు. రైతులకు గిట్టుబాటు ధర రావడం లేదని ఆయన ఆవేదన వ్యక్తం చేశారు.

English summary

YSR Congress party president YS Jagan once again lashed out at TDP president N Chandrababu Naidu.