వారు వైయస్ జగన్ కోవర్టులే: కోమటిరెడ్డి సోదరులపై పాల్వాయి ధ్వజం

By Srinivas

Published: Tuesday, May 24, 2011, 14:55 [IST]

హైదరాబాద్: నల్గొండ జిల్లాకు చెందిన ఎంపీ కోమటిరెడ్డి రాజగోపాల్ రెడ్డి, మంత్రి కోమటిరెడ్డి వెంకటరెడ్డి సోదరులు వైయస్ఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి కోవర్టులు అని కాంగ్రెసు పార్టీ సీనియర్ నేత పాల్వాయి గోవర్దన్ రెడ్డి మంగళవారం విమర్శించారు. తమ కార్యకర్తలకు డబ్బులు ఇచ్చి కోమటిరెడ్డి సోదరులు జగన్ పార్టీలోకి పంపిస్తున్నారని ఆరోపించారు. జగన్ కోవర్టుగా వ్యవహరిస్తున్న కోమటిరెడ్డి వెంకటరెడ్డిని వెంటనే మంత్రివర్గం నుండి తొలగించాలని ఆయన డిమాండ్ చేశాడు.

మంత్రివర్గంలో కోవర్టులు లేరని ముఖ్యమంత్రి కిరణ్ కుమార్ రెడ్డి చెప్పడాన్ని ప్రజలు, కాంగ్రెసు పార్టీ కార్యకర్తలు ఎవరూ నమ్మరని అన్నారు. ప్రైవేటు పోర్టులను నిర్మించే వారిని బెదిరించి కోమటిరెడ్డి సోదరులు డబ్బులు వసూలు చేస్తున్నారన్నారు. వారు డబ్బులు వసూలు చేసినట్లు తన దగ్గర సాక్ష్యాలు ఉన్నాయని అన్నారు. నిరూపించడానికి తాను సిద్ధమని చెప్పారు.

Published On May 24, 2011