వైయస్ జగన్ జైలు ఊచలు లెక్కిస్తారు: ఎంపి నామా నాగేశ్వర రావు

By Pratap

Published: Saturday, May 28, 2011, 14:01 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డిపై తెలుగుదేశం పార్లమెంటు సభ్యుడు శనివారం పార్టీ మహానాడులో నిప్పులు చెరిగారు. ఖబడ్దార్ అంటూ వైయస్ జగన్‌ను ఆయన హెచ్చరించారు. తమ పార్టీ గురించి, తమ పార్టీ అధ్యక్షుడు నారా చంద్రబాబు నాయుడి గురించి మాట్లాడే హక్కు జగన్‌కు లేదని, అలా మాట్లాడితే సహించబోమని ఆయన అన్నారు. జగన్ చర్లపల్లి జైలు ఊచలు లెక్కిస్తారని ఆయన వ్యాఖ్యానించారు.

అధికారంలో ఉండి వైయస్ జగన్, అధికారంలో లేకుండా తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు అవినీతికి పాల్పడ్డారని ఆయన ఆరోపించారు. ఓ చానెల్, ఓ పత్రిక పెట్టడానికి కెసిఆర్ ఏం వ్యాపారం చేసి సంపాదించాడని ఆయన అడిగారు. కాంగ్రెసుతోనే అవినీతి పుట్టి పెరిగిందని ఆయన అన్నారు. కుంభకోణాలకు ప్రధాని డాక్టర్ మన్మోహన్ సింగ్, కాంగ్రెసు అధ్యక్షురాలు సోనియా గాంధీ బాధ్యత వహించాలని ఆయన అన్నారు. కాంగ్రెసు పాలిత రాష్ట్రాల్లో, కేంద్రంలో అవినీతి పేరుకుపోయిందని ఆయన అన్నారు.

Published On May 28, 2011