సిఎం కిరణ్‌కు దమ్ముంటే మంత్రులను అరెస్టు చేయాలి: బిజెపి

By Srinivas

Published: Monday, June 6, 2011, 11:11 [IST]

హైదరాబాద్: రాష్ట్ర మంత్రివర్గం అంతా అవినీతిలో కూరుకు పోయిందని ముఖ్యమంత్రి కిరణ్ కుమార్ రెడ్డికి దమ్ముంటే అవినీతికి పాల్పడుతున్న రాష్ట్ర మంత్రులను అరెస్టు చేయాలని భారతీయ జనతా పార్టీ సీనియర్ నాయకుడు, మాజీ రాష్ట్ర అధ్యక్షుడు బండారు దత్తాత్రేయ అన్నారు. సమాజంలో నైతిక స్థైర్యాన్ని పెంచేందుకు రామ్‌దేవ్ బాబా ప్రయత్నిస్తున్నారని అన్నారు. అవినీతి, అక్రమాలు, నల్లడబ్బు వెనక్కి తీసుకు రావడానికి తన వంతు కృషి చేస్తున్న కేంద్ర ప్రభుత్వం ఆయనను ఆరెస్టు చేయడం అప్రజాస్వామికం అన్నారు. బాబా అరెస్టులో ఏఐసిసి అధ్యక్షురాలు సోనియాగాంధీ, ప్రధానమంత్రి మన్మోహన్ సింగ్ కుట్ర ఉందని ఆరోపించారు. కాంగ్రెసు పార్టీని సోనియా, రాహుల్ గాంధీ రక్షించలేరన్నారు. బాబా అరెస్టుకు నిరసనగా భారతీయ జనతా పార్టీ ఒక్క రోజు దీక్ష చేస్తుందని స్పష్టం చేశారు.

భారతీయ జనతా పార్టీ, రాష్ట్రీయ స్వయంసేవక్ సంఘ్ రాందేవ్ బాబాకు బహిరంగంగానే మద్దతు ప్రకటిస్తున్నాయని భారతీయ జనతా పార్టీ రాష్ట్ర అధ్యక్షులు కిషన్ రెడ్డి స్పష్టం చేశారు. బాబా దీక్ష వెనుక ఆరెస్సెస్, బిజెపి ఉన్నాయనడంలో అర్థం లేదని బహిరంగంగానే మద్దతు ప్రకటిస్తున్నాయని అన్నారు. అవినీతికి వ్యతిరేకంగా ఎవరూ పోరాడినా బిజెపి మద్దతిస్తుందన్నారు. అన్నాహజారే, బాబాలవి ప్రజా ఉద్యమాలు అన్నారు. బాధ్యతగల ప్రతిపక్షంగా వారికి మేం మద్దతు ప్రకటిస్తున్నామని చెప్పారు. బాబాను క్రిమినల్ అని ఇప్పుడు చెబుతున్న కేంద్ర మంత్రులు మొదట విమానాశ్రయంలో ఎర్రతివాచి ఎందుకు పరిచారని ప్రశ్నించారు. కాగా ఈ దీక్షలో దత్తాత్రేయ, కిషన్ రెడ్డి, నిజామాబాద్ ఎమ్మెల్యే యెండల లక్ష్మీనారాయణ తదితరులు పాల్గొన్నారు.

Published On June 6, 2011