తెలంగాణ కిటుకు ఇక్కడే ఉంది!: టి-కాంగ్రెసుకు కెసిఆర్ సూచన

By Srinivas

Published: Sunday, June 19, 2011, 12:50 [IST]

హైదరాబాద్: విజయవాడ పార్లమెంటు సభ్యుడు లగడపాటి రాజగోపాల్ చెబుతున్న సమైక్యాంధ్ర ఓ బూటకం అని తెలంగాణ రాష్ట్ర సమితి అధ్యక్షుడు కె చంద్రశేఖరరావు ఆదివారం అన్నారు. తెలంగాణ ఐక్య కార్యాచరణ సమితి ఆధ్వర్యంలో పట్నం రోడ్లపై పొయ్యిలు కార్యక్రమంలో భాగంగా ఆయన బసవ తారకం క్యాన్సర్ హాస్పిటల్ వద్ద వంటవార్పులో పాల్గొన్నారు. ఈ సందర్భంగా ఆయన విలేకరులతో మాట్లాడారు. కేంద్రం వెంటనే తెలంగాణపై స్పందించాలని ఆయన డిమాండ్ చేశారు. వచ్చే పార్లమెంటు సమావేశాలలో తెలంగాణ బిల్లు పెట్టాలని అన్నారు.

పట్టణంలో అంతటా ప్రశాంతంగా కార్యక్రమం కొనసాగుతుందని అన్నారు. నాలుగున్నర కోట్ల ప్రజలు ప్రత్యేక రాష్ట్రం కావాలని డిమాండ్ చేస్తే వద్దని చెప్పే హక్కు ఎవరికి ఉందన్నారు. మేం శాంతియుతంగానే ఉన్నామని చెప్పారు. తెలంగాణ కాంగ్రెసు ప్రజాప్రతినిధులు వెంటనే రాజీనామా చేయాలని డిమాండ్ చేశారు. పార్టీలకతీతంగా అందరం కలిసి సంఘటితంగా పోరాడితేనే తెలంగాణ సాధిస్తామని అన్నారు. త్వరలో తాను తెలంగాణ ఎంపీలతో సమావేశమవుతానని చెప్పారు. రాయబారాలతో తెలంగాణ రాదన్నారు. టి-కాంగ్రెసు ప్రజాప్రతినిధులు రాజీనామా చేస్తే వారిని అధిక మెజార్టీతో గెలిపించే బాధ్యత మాదే అన్నారు.

పైరవీలతో మాత్రం తెలంగాణ రాదని తెలుసుకోవాలన్నారు. ఇక్కడ ఉంటేనే తెలంగాణ వచ్చే మార్గముందన్నారు. త్యాగాలతో తెలంగాణ ఖచ్చితంగా వస్తుందన్నారు. అందరితో కలిసి ఉద్యమ కార్యాచరణ రూపొందిస్తామని చెప్పారు. ముందు ముందు అసహజమైన పరిణామాలు ఏర్పడితే దానికి కేంద్రమే బాధ్యత వహించాలన్నారు. నాటి ప్రధాని జవహర్ లాల్ నెహ్రూ కూడా విడిపోవాలనుకుంటే విడిపోవచ్చునని చెప్పారని గుర్తు చేశారు. కెసిఆర్ ఈ కార్యక్రమంలో గరిట తిప్పారు. అనంతరం అక్కడే ఆయన కూర్చుని అందరితో కలిసి తిన్నారు.

Published On June 19, 2011