జగన్‌తో బెట్టింగ్‌కు సిద్ధం, జనం అందుకే వస్తున్నారు: జెసి దివాకర్

By Srinivas

Published: Thursday, June 23, 2011, 18:03 [IST]

హైదరాబాద్: రాష్ట్రంలో కాంగ్రెసు ప్రభుత్వం పడిపోతుందనే విషయంపై వైయస్ఆర్ కాంగ్రెసు పార్టీ అధ్యక్షుడు వైయస్ జగన్మోహన్‌తో తాను బెట్టింగ్‌కు సిద్ధమని అనంతపురం జిల్లా కాంగ్రెసు పార్టీ సీనియర్ శాసనసభ్యుడు, మాజీ మంత్రి జెసి దివాకర్ రెడ్డి గురువారం అన్నారు. రాష్ట్రంలో కాంగ్రెసు పార్టీ అధికారం కోల్పోతే కాంగ్రెసులోని నేతలు చాలామంది వైయస్ జగన్ వెంట వెళతారని ఆయన అభిప్రాయపడ్డారు. అనంతపురం జిల్లాలో వైయస్ జగన్ చేస్తున్న ఓదార్పు యాత్రకు కాంగ్రెసు నేతల సహకారం ఉందని ఆయన ఆరోపించారు. తాను అసలైన కాంగ్రెసు వాదినని అన్నారు. అనంతపురం జిల్లాలో మిగతా నేతలంతా గోడ మీది పిల్లుల్లా ఉన్నారని అన్నారు. జగన్ వల్ల కాంగ్రెసుకు కొద్దిగా నష్టం నిజమే అని అయితే తాను పూడ్చుకుంటామని అన్నారు.

ఏఐసిసి అధ్యక్షురాలు సోనియాగాంధీని ఢీకొన్నందువల్లే జగన్ సభలకు జనాలు వస్తున్నారని అన్నారు. అలాంటి నాయకురాలితో ఛాలెంజ్ చేస్తే అలాగే ఉంటుందని అది ప్రత్యేకత ఏమీ కాదన్నారు. సమైక్యాంధ్ర కోసం ఉద్యమించే ప్రతి ఒక్కరికీ తన మద్దతు ఉంటుందన్నారు. తాను సమైక్యాంధ్రనే కోరుకుంటున్నానని చెప్పారు. అయితే అధిష్టానం నిర్ణయానికి మాత్రం కట్టుబడతానని చెప్పారు.

Published On June 23, 2011