పేపర్లో నాగం స్టేట్‌మెంట్లు వెనుక పేజికి వెళ్లి పోయాయి: టిడిపి

By Srinivas

Published: Friday, June 24, 2011, 16:46 [IST]

కరీంనగర్: తెలుగుదేశం పార్టీ బహిష్కృత శాసనసభ్యుడు నాగం జనార్దన్ రెడ్డి స్టేట్ మెంట్లు తెలుగుదేశం పార్టీ నుండి బహిష్కరణకు గురైన తర్వాత ముందు పేజి నుండి వెనుక పేజికి వెళ్లి పోయాయని తెలుగుదేశం పార్టీ సీనియర్ నేతలు మోత్కుపల్లి నరసింహులు, కడియం శ్రీహరి, రమేష్ రాథోడ్ శుక్రవారం ఎన్టీఆర్ ట్రస్టు భవన్‌లో ఏర్పాటు చేసిన మీడియా సమావేశంలో అన్నారు. టిడిపిలో ఉన్నంత కాలం నాగం నేతగా ఉన్నారని ఇప్పుడు జీరోగా మారారని ఎద్దేవా చేశారు. ఇతర పార్టీలు నాగంను వాడుకుంటున్నాయని ఆ విషయాన్ని ఆయన గుర్తిస్తే మంచిదన్నారు. వైయస్సాఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డితో కుమ్మక్కు కావడం వల్లనే చంద్రబాబుపై విమర్శలు చేస్తున్నారని ఆన్నారు. నాగంకు నైతిక విలువలు ఉంటే వెంటనే రాజీనామా చేయాలని వారు డిమాండ్ చేశారు.

కాగా రాజీనామాలతో రాజకీయ సంక్షోభం సృష్టించడానికి తెలుగుదేశం పార్టీ సిద్ధంగా ఉందని ఆపార్టీ సీనియర్ నాయకులు ఎర్రబెల్లి దయాకర్‌రావు కరీంనగర్‌లో తెలిపారు. పొలిటికల్ జెఏసి చైర్మన్ కోదండరామ్‌కు చేతనైతే రాజీనామాల డెడ్‌లైన్‌లపై వెంటనే స్పందించాలని లేకపోతే నాలుగు, ఐదు రోజుల్లో టిడిపి రౌండ్ టేబుల్ సమావేశాన్ని ఏర్పాటు చేస్తుందని ఎర్రబెల్లి అన్నారు. కాగా కరీంనగర్‌లో జరిగిన తెలుగుదేశం పార్టీ సమావేశాన్ని తెలంగాణవాదులు అడ్డుకునే ప్రయత్నం చేశారు.

Published On June 24, 2011