జగన్‌ను ఢీకొనెందుకు రంగంలోకి కెవిపి, రాష్ట్రంలో ముఖ్య పదవి!

By Srinivas

Published: Sunday, June 26, 2011, 16:28 [IST]

హైదరాబాద్: దివంగత ముఖ్యమంత్రి వైయస్ రాజశేఖరరెడ్డికి అండగా ఉన్న మాజీ ప్రభుత్వ సలహాదారు కెవిపి రామచంద్రారావు ఇక ముందు కాంగ్రెసు పార్టీలో ప్రధాన పాత్ర పోషించి వైయస్ఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డిని ఢీకొనేందుకు సిద్ధమవుతున్నట్లుగా తెలుస్తోంది. రాష్ట్రంలో కెవిపిని ఒక ముఖ్యమైన పదవిలో కూర్చుండబెట్టాలని ఏఐసిసి అధ్యక్షురాలు సోనియాగాంధీ నిర్ణయించినట్లుగా సమాచారం. వైయస్‌కు పూర్తిగా అండగా ఉన్న కెవిపికి వైయస్ సన్నిహితులు ఎవరో తెలుసు, రాష్ట్రంలో అందరినీ ఏకత్రాటిపైకి తీసుకు రావడం ఎలాగో తెలుసు అని అధిష్టానం భావిస్తున్నట్లుగా సమాచారం. అందుకే జగన్‌ను ఎదుర్కొనడానికి కెవిపిని రంగంలోకి దింపనున్నట్లుగా తెలుస్తోంది.

దీనికి కెవిపి కూడా అంగీకరిచినట్లుగా సమాచారం. అమ్మ అభయంతో కెవిపికి ఉన్నత పదవి వస్తుందని ఊహాగానాలు వస్తున్న నేపథ్యంలో కెవిపి అనుచరుల్లో ఉత్సాహం పొంగుకొస్తుందంట. కెవిపి కూడా జగన్‌ను రాజకీయంగా ఢీకొనేందుకు అధిష్టానం ముందు సిద్ధమని ప్రకటించినట్లుగా తెలుస్తోంది. ఇప్పటికే బొత్స పిసిసి అధ్యక్షుడిగా నియమించబడిన తర్వాత జగన్ వైపు వెళ్లేందుకు సిద్ధమయిన పలువురు శాసనసభ్యులు, ముఖ్య నేతలు మళ్లీ కాంగ్రెసు బాట పట్టారు. కెవిపికి ముఖ్యమైన పదవిని అప్పగించి ఆయన తన పాత్ర పోషిస్తే జగన్‌కు గడ్డుకాలం వస్తుందని పలువురు భావిస్తున్నారు. వైయస్ హయాంలో కెవిపి తెర వెనుక ఉన్నప్పటికీ అంతా ఆయన కనుసన్నుల్లోనే నడిచేదనే వాదనలు ఉన్నాయి.

ఇటీవలె సోనియాగాంధీని కలిసిన కెవిపి అమ్మ నుండి ఆశీర్వాదం పొందినట్టు తెలుస్తోంది. ఆయన ఇటీవల కొన్ని రోజులు న్యూఢిల్లీలోనే తిష్ట వేశారు. ఓ సమయంలో ఆయనకు పిసిసి పదవి వస్తుందనే వాదనలు కూడా వినిపించాయి. ఆదివారం కెవిపి ముఖ్యమంత్రి కిరణ్ కుమార్ రెడ్డిని కలిశారు. దీంతో ఆయనకు ఇవ్వాల్సిన పదవిపైతో పాటు రాష్ట్ర కాంగ్రెసు పరిస్థితిపై కూడా చర్చించినట్లుగా పలువురు భావిస్తున్నారు.

Published On June 26, 2011