తన చేతినే కాల్చుకుని తిన్న వృద్ధుడు, ఒళ్లు గగుర్పొడిచే సంఘటన

విశాఖపట్నం: విశాఖపట్నం జిల్లా పాయకరావుపేటలో ఒళ్లు గగుర్పొడిచే సంఘటన సోమవారం చోటు చేసుకుంది. ఓ వృద్ధుడు తన చేతినే కాల్చుకుని తిన్నాడు. ఆకలి బాధను తట్టుకోలోకపోయాడో, మతిస్థిమితం కోల్పోయాడో తెలియదు గానీ తన ఎడమ చేతిని తానే తిని సంచలనం సృష్టించాడు ఆ వ్యక్తి. స్థానిక సిరి దుకాణ సముదాయం సమీపంలోని రోడ్డు పక్కన ఉన్న సిమెంటు తూరలో కూర్చుని ఒక వ్యక్తి తన ఎడమ చేతిని తానే తింటుండడాన్ని గమనించిన స్థానికులు పత్రికా ప్రతినిధులకు సమాచారం అందించారు.

ఆనోటా ఈనోటా విషయం తెలిసిన పట్టణవాసులు పెద్దఎత్తున అక్కడ గుమిగూడారు. అయితే అప్పటికే అతడు అరడుగు పొడవునా చేతిని తినేశాడు. అంతకుముందు ఉదయాన్నే బ్లేడుతో చేతి వేళ్లను కోసుకుని వాటిని సూర్యమహల్‌ థియేటర్‌ ఎదురుగా పేపర్లతో కాల్చుకుని తన వెంట తీసుకువెళ్లినట్లు కొందరు చెప్పారు. పదిగంటల తర్వాత సిమెంటు తూరలో కూర్చుని చేతిని ఆరగిస్తున్న విషయాన్ని స్థానికులు గమనించారు. అతడి ఒళ్లంతా రక్తం కారిపోగా, మాట్లాడుతున్న భాష ఏమిటో అర్థం కాలేదు. సమాచారం పోలీసులకు తెలియడంతో బాధితుడిని తుని ప్రభుత్వ ఆసుపత్రికి తరలించారు.

English summary

An old man at Payakaraopet of Visakhapatnam district consumed his own hand.