కెసిఆర్! సమాధానం చెప్పు: టిడిపి నేత కడియం

హైదరాబాద్: తెలంగాణకు ద్రోహం చేస్తున్న మంత్రులతో తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖరరావు చర్చలు ఎందుకు జరిపారో చెప్పాలని తెలుగుదేశం పార్టీ సీనియర్ నాయకుడు, మాజీ మంత్రి కడియం శ్రీహరి గురువారం ప్రశ్నించారు. రాష్ట్ర మంత్రి జానారెడ్డి, కేంద్రమంత్రి జైపాల్ రెడ్డి ఇద్దరూ తెలంగాణ ద్రోహులు అన్నారు. అలాంటి వారితో చర్చలు జరపడం వెనుక ఉద్దేశ్యం ఏమిటన్నారు. వారు తెలంగాణకు వెన్నుపోటు పొడిచారన్నారు.

పిసిసి అధ్యక్షుడు బొత్స సత్యనారాయణతో టిఆర్ఎస్ శాసనసభ్యుడు హరీష్ రావు భేటీ వెనుక ఆంతర్యమేమిటన్నారు. సమైక్యాంధ్ర నేతలు బొత్స, రఘువీరారెడ్డి, పురంధేశ్వరి తెలంగాణలలో పర్యటించినప్పుడు టిఆర్ఎస్ ఎందుకు అడ్డుకోలేదని కడియం ప్రశ్నించారు. కాగా ప్రభుత్వం అనాలోచిత నిర్ణయాల వల్ల రాష్ట్రలో పరిపాలన పూర్తిగా స్తంభించిందని మరో నేత దేవేందర్ గౌడ్ వేరుగా అన్నారు. తెలుగుదేశం పార్టీని బలహీనపర్చే ఉద్దేశ్యంతో అధికార కాంగ్రెసు మరో 50 గ్రామాలను గ్రేటర్ హైదరాబాదులో కలపాలని చూస్తుందన్నారు.

English summary

TDP leader Kadiyam Srihari questioned TRS president K Chandrasekhar Rao on his meeting with Jana Reddy. He blamed Jana Reddy and Jaipal Reddy on Telangana.