చిదంబరం వ్యాఖ్యలపై డోంట్ కేర్ అన్న కెసిఆర్

By Srinivas

Published: Monday, July 4, 2011, 16:11 [IST]

హైదరాబాద్: కేంద్రమంత్రి చిదంబరం స్టేట్‌మెంటును తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు లైట్‌గా తీసుకున్నారు. ఆ ప్రకటనను పట్టించుకోవాల్సిన అవసరం లేదన్నట్టుగా మాట్లాడారు. సీమాంధ్ర నేతలు తెలంగాణ రెచ్చగొట్టి ప్రజల మధ్య చిచ్చు పెట్టడం మానుకోవాలని సూచించారు. లేదంటే 1969 పునరావృతం అవుతుందని హెచ్చరించారు. పరిస్థితి చేయిదాటింది కాబట్టే టి-కాంగ్రెసు ప్రజాప్రతినిధులు రాజీనామా చేశారని చెప్పారు. జెఏసి సమావేశంలో కీలక నిర్ణయాలు తీసుకుంటామని చెప్పారు. కేంద్ర ప్రభుత్వం డిసెంబర్ 9న చేసిన ప్రకటనకు కట్టుబడి ఉండాలన్నారు. కేంద్రం తెలంగాణ ప్రకటించకుంటే ఇక రాష్ట్రం అగ్నిగుండమే అవుతుందన్నారు. టి-కాంగ్రెసు నేతలు చాలా ఓపిక పట్టారని చెప్పారు. ఓపికకు కూడా ఓ హద్దు ఉంటుందన్నారు.

మంత్రి జానారెడ్డి న్యూఢిల్లీ వెళ్లడం అనుమానాలకు తావిస్తోందని సిద్దిపేట శాసనసభ్యుడు హరీశ్ రెడ్డి వేరుగా అన్నారు. రాజీనామా చేసిన ప్రజాప్రతినిధులు వారి రాజీనామాలు ఆమోదింప జేసుకోవాలని అన్నారు. కాగా తెలంగాణ ఐక్య కార్యాచరణ సమితి సోమవారం అత్యవసర భేటీ అయింది. ఈ భేటీలో వారు కీలక నిర్ణయాలు తీసుకోనున్నట్లుగా తెలుస్తోంది. 24 గంటల తెలంగాణ బంద్, రైల్ రోకో తదితర కార్యక్రమాలు చేపట్టవచ్చునని తెలుస్తోంది. తెలంగాణ ఉద్యోగ సంఘాలు కూడా సహాయ నిరాకరణ చేసే అవకాశం ఉంది.

Published On July 4, 2011