ఎంపీల రాజీనామా వాయిదా: స్పీకర్ ఆఫీసులోనే నిరీక్షణ

By Srinivas

Published: Monday, July 4, 2011, 12:45 [IST]

న్యూఢిల్లీ: తెలంగాణ కాంగ్రెసు పార్లమెంటు సభ్యుల రాజీనామా సాయంత్రానికి వాయిదా పడింది. స్పీకర్ మీరా కుమారిని వారు ఉదయం పదకొండు గంటలకు అపాయింటుమెంటు కోరారు. అయితే వారు సమయానికి తన వద్దకు రాక పోవడంతో స్పీకర్ భోపాల్ పర్యటనకు వెళ్లారు. ఎంపీలు మీడియా ముందుకు వచ్చి ఆలస్యానికి కారణం వివరించారు. దారిలో ట్రాఫిక్ జాం అయిన కారణంగానే సమయానికి స్పీకర్ వద్దకు చేరుకోలేక పోయామని చెప్పారు. సాయంత్రం ఐదున్నర గంటలకు స్పీకర్ మరోసారి అపాయింటుమెంటు ఇచ్చినందున అప్పుడు కలిసి రాజీనామాలు సమర్పిస్తామని చెప్పారు. అందరూ సంతకం చేసిన రాజీనామా పత్రాలను ఇప్పటికే స్పీకర్ టేబుల్ పైన ఉంచి వచ్చామని వారు చెప్పారు.

ఎంపీలు మధు యాష్కీ, బలరామ్ నాయక్ ఫ్యాక్స్ ద్వారా రాజీనామాలు పంపిస్తారని చెప్పారు. కాగా అధిష్టానంతో చర్చలకు తాము వ్యతిరేకం కాదని చెప్పారు. అయితే తెలంగాణ ఇస్తామనే ఒకే ఒక డిమాండ్‌తో తాము చర్చలకు సిద్ధమని ప్రకటించారు. తమ అంతిమ లక్ష్యం తెలంగాణే అని చెప్పారు. రాజీనామాలపై ఎలాంటి రెండో ఆలోచన లేదన్నారు. స్పీకర్ వచ్చే వరకు ఇక్కడే ఉంటామని చెప్పారు. కాగా హైదరాబాదులో మంత్రి జానారెడ్డి మంత్రుల రాజీనామా పత్రాలను డిప్యూటీ స్పీకర్ మల్లు భట్టి విక్రమార్కకు సమర్పించారు. హోంమంత్రి సబితా ఇంద్రారెడ్డి రాజీనామా సైతం అందులో ఉన్నట్టుగా సమాచారం. రాజీనామాలు సమర్పించడానికి తెలుగుదేశం పార్టీకి చెందిన ఇద్దరు తెలంగాణ ప్రాంత లోకసభ సభ్యులు నామా నాగేశ్వర రావు, రమేష్ రాథోడ్ ఢిల్లీకి బయలుదేరారు.

Published On July 4, 2011