ఘోర రైలు ప్రమాదంలో 53 మంది దుర్మరణం

By Pratap

Published: Monday, July 11, 2011, 14:08 [IST]

లక్నో: ఉత్తరప్రదేశ్‌లో ఘోర రైలు ప్రమాదం సంభవించింది. ఫతేపూర్ సమీపంలోని మాల్వా వద్ద ఆదివారం సాయంత్రం కల్కా మెయిల్ బోగీలు 12 పట్టాలు తప్పడంతో దాదాపు 53 మంది మరణించారు, 250 మందికి పైగా గాయపడ్డారు. పశ్చిమ బెంగాల్‌లోని హౌరా నుంచి ఢిల్లీకి బయలుదేరిన ఎక్స్‌ప్రెస్ రైలు ట్రాక్‌ నుంచి వైదొలగింది. హెల్ప్‌లైన్ నెంబర్లు - అలహాబాద్ (05322408128, 05322407353), కాన్పూర్ (05122323015).

అత్యంత వేగంగా దూసుకెళ్తున్న రైలు ఇంజన్‌తో పాటు 10 - 15 బోగీలు పట్టాలు తప్పాయని ప్రత్యక్ష సాక్షులు చెబుతున్నారు. సంఘటనా స్థలానికి అలహాబాద్, కాన్పూర్‌ల నుంచి రెండు మెడికల్ వ్యానులను పంపించారు. అక్కడ ఉండిపోయిన ప్రయాణికులను తరలించడానికి మరో రైలును పంపించారు. రైల్వే ఉన్నతాధికారులు సంఘటనా స్థలానికి హుటాహుటిన చేరుకున్నారు. ప్రయాణికులను బయటకు తీయడానికి గ్యాస్ కట్టర్లు వాడుతున్నారు. గాయపడినవారిని ఫతేపూర్‌లోని ఆస్పత్రికి తరలించారు.

డ్రైవర్ అత్యవసరమైన బ్రేకులను వేయడం వల్లనే రైలు పట్టాలు తప్పిందని అనుమానిస్తున్నారు. అయితే, అతను అలా ఎందుకు చేయాల్సి వచ్చిందనేది తెలియాల్సి ఉంది. ఈ ప్రమాదంలో డ్రైవర్ తీవ్రంగా గాయపడ్డాడు. ఈ ప్రమాదంతో రద్దీగా ఉండే హౌరా - ఢిల్లీ మార్గంలో రైళ్ల రాకపోకలు నిలిచిపోయాయి. ఈ ఏడాదిలో ఇదే అత్యంత పెద్ద రైలు ప్రమాదం.

Published On July 11, 2011