సీమాంధ్రులు కాదంటే దంచికొడుదాం: కెసిఆర్

హైదరాబాద్: సీమాంధ్రులను మంచిగా అడుగుదామని, కాదంటే దంచికొడుదామని తెలంగాణ రాష్ట్ర సమితి (తెరాస) అధ్యక్షుడు కె.చంద్రశేఖర రావు అన్నారు. ప్రత్యేక రాష్ట్ర సాధనకు ఇదే సరైన సమయమని, ఇప్పుడు రాకుంటే మరెన్నడూ ఈ ప్రాంత ప్రజల కల నెరవేరదని ఆయన అన్నారు. దేశచరిత్రలో మున్నెన్నడూ లేనివిధంగా 140 మంది ప్రజాప్రతినిధులు తెలంగాణ కోసం రాజీనామాలు చేస్తే సీమాంధ్ర నేతలు అవహేళన చేసి మాట్లాడుతున్నారని ధ్వజమెత్తారు. బొగ్గుగని కార్మిక సంఘం నాయకులు, కార్యకర్తలు, ఖమ్మం జిల్లా భద్రాచలం, పాల్వంచ, మణుగూరు నుంచి వచ్చిన నాయకులతో కేసీఆర్‌ ఆదివారం మాట్లాడారు. రాజీనామాలన్నవి చిన్నవిషయం కాదని, దీన్ని కూడా ఎకసక్కాలాడి కించపరుస్తున్నారని, వందశాతం ప్రత్యేక రాష్ట్రం వచ్చి తీరితేనే సీమాంధ్ర వలసవాదుల అణచివేత నుంచి బయటపడ్తామని, వ్యక్తిగా నేను చేయగలిగింది చాలా తక్కువ అని అందరం ఒక్కటిగా నిలుద్దామని ఆయన అన్నారు.

ఒక్కటై పిడికిలి బిగిస్తే శత్రువు ముఖం బద్ధలవుతుందన్నారు. ఈ వలసపెత్తందార్లు ఇంకెన్నాళ్లుంటారో అడుగుదామని ఆయన అన్నారు. సింగరేణి బతికి ఉండాలంటే ప్రత్యేక రాష్ట్రం వచ్చి తీరాలని చెప్పారు. సింగరేణిలో ఉద్యోగుల బదిలీలపై బెంగవద్దని, ఆ విషయమై సంస్థ ఎండీతో తాను మాట్లాడుతానని చెప్పారు. ప్రత్యేక రాష్ట్రంలోనే సమస్యలు పరిష్కారమవుతాయన్నారు. శత్రువు దాడిని చూసి భయపడవద్దని, అలా భయపడి ఉంటే తాను ఎప్పుడో పోయేవాడినన్నారు. ఉద్యమంలో పాల్గొంటున్నపుడు కొంత రాపిడికి గురికాకతప్పదని, 11ఏళ్లుగా ఉద్యమిస్తున్న తనను ఎందరో ఎన్నో తిట్లుతిట్టారని, అనేక నిందలు వేశారని చెప్పారు. ఇదే మరెవరైనా అయితే గుండె పగిలి చచ్చేవారన్నారు. అతి త్వరలోనే మనల్ని మనం పాలించుకునే శక్తి వస్తుందని హామీ ఇచ్చారు.

లక్ష్యం కోసం బయల్దేరామని, గమ్యం చేరాలని, పొరపాటున ఇప్పుడు తెలంగాణ రాకపోతే మన అడ్రస్‌ మిగలదని ఇక్కడెవరం మిగలమని, ఎవ్వరినీ ఉండనీయరని, మనవి బానిస బతుకులవుతాయనిని కేసీఆర్‌ హెచ్చరించారు. టీజీ వెంకటేశ్‌ను ఆయన పిచ్చి మంత్రిగా అభివర్ణించారు. ఉద్యమాన్ని ప్రజల కోణంలో చూడాల్సిన మంత్రి ప్రత్యేక సైన్యం అని మాట్లాడుతుంటే ప్రజాస్వామ్యం అన్నదానికి అర్థం లేకుండా పోయిందనిపిస్తోందన్నారు.