చంద్రబాబు పనికి మాలిన ప్రతిపక్ష నేత: కెటిఆర్

By Srinivas

Published: Tuesday, July 19, 2011, 14:27 [IST]

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడు అంత పనికి మాలిన ప్రతిపక్ష నేత ఇంత వరకు రాలేదని తెలంగాణ రాష్ట్ర సమితి సిరిసిల్ల శాసనసభ్యుడు కల్వకుంట్ల తారక రామారావు మంగళవారం టిఆర్ఎస్ భవన్‌లో మాట్లాడుతూ ధ్వజమెత్తారు. చంద్రబాబు జై తెలంగాణ, జై ఆంధ్ర అనకుంటే టిడిపికి బతుకు ఉండదన్నారు. తెలంగాణ విషయంపై మాట్లాడడానికి చంద్రబాబు ఎప్పుడూ బయటకు రాడన్నారు. తెలంగాణ తెలుగుదేశం పార్టీ ప్రజాప్రతినిధులు ఇప్పటికైనా చంద్రబాబును వీడి బయటకు రావాలన్నారు. తెలంగాణ కాంగ్రెసు ప్రజాప్రతినిధులు అధిష్టానంతో తెలంగాణ కోసం చిత్తశుద్దితో పోరాటం చేస్తున్నారని చెప్పారు. చంద్రబాబు అమావాస్య చంద్రుడుగా మిగిలిపోక తప్పదన్నారు.

సీమాంధ్ర కాంగ్రెసు ప్రజాప్రతినిధులు ఉస్మానియా, కాకతీయ విశ్వవిద్యాలయం విద్యార్థులపై చేసిన ఆరోపణలు ఖండిస్తున్నానని అన్నారు. విద్యార్థులు చేస్తున్న ఉద్యమాన్ని అణిచి వేసి ఇప్పుడు నక్సలైట్లు అంటే అర్థం ఏమిటని ప్రశ్నించారు. సీమాంధ్ర ప్రజా ప్రతినిధులు అహంకారంతో మాట్లాడుతున్నారని విమర్శించారు. ఓయు, కెయు విశ్వవిద్యాలయాల విషయంలో ప్రభుత్వం చేతకాని తనం బయటపడుతుందన్నారు. హైదరాబాదును విడిచి వెళ్లాలని చెప్పే పరిస్థితి తెచ్చుకోవద్దని ఆయన సీమాంధ్ర ప్రజాప్రతినిధులకు సూచించారు. రాయలసీమ నుండే ఫ్యాక్షనిజం, బాంబుల సంస్కృతి హైదరాబాదుకు వచ్చిందన్నారు.

Published On July 19, 2011