ప్రధానిని మళ్లీ లాగిన రాజా, సాక్షిగా చిదంబరం

By Pratap

Published: Tuesday, July 26, 2011, 15:34 [IST]

న్యూఢిల్లీ: ప్రధాని డాక్టర్ మన్మోహన్ సింగ్‌ను టెలికం మాజీ మంత్రి ఎ. రాజా మళ్లీ 2జి స్పెక్ట్రమ్ కుంభకోణంలోకి లాగారు. 2జి స్పెక్ట్రమ్ కుంభకోణం కేసులో ప్రస్తుత హోం మంత్రి పి. చిదంబరాన్ని సాక్షిగా చేర్చాలని ఆయన మంగళవారం కోర్టును కోరారు. 2జి స్పెక్ట్రమ్ కేటాయింపులను పరిశీలించడానికి ప్రధాని మంత్రుల బృందాన్ని ఏర్పాటు చేయకపోవడాన్ని ఆయన తప్పు పట్టారు. ప్రధాని తనకన్నా ఉన్నతస్థాయివారని, అందువల్ల ప్రధాని మంత్రుల బృందాన్ని పరిశీలనకు నియోగించి ఉండాల్సిందని ఆయన అన్నారు. తాను ఎవరినీ లాగడం లేదని చెప్పిన కొద్ది గంటల తర్వాత మళ్లీ కోర్టులో ఆ వాదన వినిపించారు.

టెలికమ్ కంపెనీలకు వాటా కల్పించే విషయం ప్రధాని మన్మోహన్ సింగ్‌కు, అప్పటి ఆర్థిక మంత్రి చిదంబరానికి తెలుసునని ఆయన సోమవారం అన్నారు. మీడియానే ఈ విషయంలో ఆయన తప్పు పట్టారు. ఆరు నెలలుగా జైలులో ఉన్న రాజా - తనను అక్రమంగా నిర్బంధించారని ఆరోపిస్తూ వెంటనే విడుదల చేయాలని కోరారు. ప్రత్యేక న్యాయమూర్తి ఒపి సైనీ ముందు రాజా తరఫు న్యాయవాది సుశీల్ కుమార్ తన వాదనలు వినిపించారు.

2జి స్పెక్ట్రమ్ అంశమంతా రాజకీయ క్రీడ అని, రాజాకు రక్షణ కల్పించాలని రాజా తరఫు న్యాయవాది అన్నారు. తన అధికారిక విధుల్లో భాగంగానే రాజా అన్ని పనులు చేశారని ఆయన వాదించారు. ఈ కేసులో జీరో నష్టం ఉందని పార్లమెంటు ప్రజలకు తెలిపిందని, దానిపై భారత ప్రభుత్వం ఓ వైఖరి తీసుకుందని, అందుకని రాజాకు రక్షణ కల్పించాల్సిన అవసరం ఉందని ఆయన అన్నారు.

Published On July 26, 2011