తెలంగాణపై జగన్ స్పష్టం చేయాల్సిందే: లగడపాటి

By Pratap

Published: Wednesday, July 27, 2011, 18:47 [IST]

విజయవాడ: తెలంగాణ అంశంపై వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి స్పష్టమైన వైఖరి వెల్లడించాల్సిందేనని సీమాంధ్ర కాంగ్రెసు పార్లమెంటు సభ్యుడు లగడపాటి రాజగోపాల్ అన్నారు. తెలుగుదేశం పార్టీ అధ్యక్షుడు నారా చంద్రబాబు నాయుడు, జగన్ తమ తమ పార్టీల్లో అంతర్గత చర్చలు జరిపి పార్టీపరంగా ఏకాభిప్రాయానికి రావాలని ఆయన బుధవారం మీడియా ప్రతినిధుల సమావేశంలో సూచించారు. తెలంగాణపై తాము డిసెంబర్ 9వ తేదీకి ముందే చెప్పామని అంటున్నారని, చంద్రబాబు ఏం చెప్పారో ఎవరికీ అర్థం కావడం లేదని ఆయన అన్నారు. వివిధ సంఘాలు కూడా అంతర్గత చర్చల ద్వారా ఏకాభిప్రాయానికి రావాల్సిన అవసరం ఉందని ఆయన అన్నారు. కాంగ్రెసు పార్టీ అ దిశగా చర్చలు ప్రారంభించిందని ఆయన చెప్పారు.

తెలంగాణపై కేంద్ర ప్రభుత్వం స్పష్టంగా చెప్పిందని, ఏకాభిప్రాయం సాధించకుండా రాష్ట్రం ఏర్పాటు సాధ్యం కాదని చెప్పిందని ఆయన అన్నారు. ఏకాభిప్రాయం వచ్చినా రాష్ట్రం ఏర్పాటు చేయాలనే నిబంధన లేదని, జాతీయ ప్రయోజనాలను దృష్టిలో ఉంచుకుని కేంద్ర ప్రభుత్వం నిర్ణయం తీసుకుంటుందని ఆయన అన్నారు. రెండు వారాల్లోగా కేంద్రం తెలంగాణపై నిర్ణయం తీసుకుంటుందని తెలంగాణ రాష్ట్ర సమితి (తెరాస) అధ్యక్షుడు అన్నారని, ఈ రోజుతో రెండు వారాలు గడిచిపోయాయని, ఏ విధమైన నిర్ణయం రాలేదని ఆయన అన్నారు. రాష్ట్రంలో ఒక్క శాతం ఓట్లు కూడా రాని బిజెపి, సిపిఐ జాతీయ పార్టీల పేరు మీద హడావిడి చేస్తున్నాయని ఆయన వ్యాఖ్యానించారు.

తెలంగాణ రాష్ట్రం ఏర్పాటు చేసే ఆలోచన లేదని ఉప ప్రధానిగా ఉన్నప్పుడు బిజెపి అగ్రనేత ఎల్‌కె అద్వానీ చెప్పారని ఆయన గుర్తు చేశారు. శాసనసభ తీర్మానం చేస్తేనే రాష్ట్ర ఏర్పాటు సాధ్యమవుతుందని, శాసనసభ తీర్మానం చేసినా రాష్ట్రాన్ని ఏర్పాటు చేయాలని ఏమీ లేదని విదర్భ విషయంలో అద్వానీ చెప్పారని ఆయన అన్నారు. బిఆర్ అంబేడ్కర్ తెలంగాణ రాష్ట్ర ఏర్పాటుకు అనుకూలంగా చెప్పారనేది కూడా అబద్ధమని ఆయన అన్నారు. తెలంగాణ, ఆంధ్ర విడిపోవచ్చునని నెహ్రూ చెప్పలేదని ఆయన అన్నారు. కట్టుకథలు, పిట్టకథలు చెబుతూ ఉద్వేగాలను రెచ్చగొడుతున్నారని, విద్యార్థుల ఆత్మహత్యలకు కారణమవుతున్నారని ఆయన విమర్శించారు. హైదరాబాదులో ఉన్న ఆస్తి కోసమే తాను సమైక్యాంధ్ర గురించి మాట్లాడుతున్నారని కెసిఆర్ భావిస్తే తన ఆస్తి అంతా రాసిస్తానని, అప్పుడు కెసిఆర్ సమైక్యాంధ్ర అంటారా అని ఆయన అన్నారు. సమైక్యాంధ్ర ఆస్తి కోసం కాదని ఆయన అన్నారు.

Published On July 27, 2011