చచ్చి బతికి మళ్లీ చచ్చాడు: ఓ ఆసుపత్రి నిర్వాకం!

By Srinivas

Published: Sunday, August 7, 2011, 14:15 [IST]

హైదరాబాద్: ఓ వ్యక్తి చనిపోక ముందే చనిపోయినట్లు సర్టిఫికేట్ ఇవ్వడం, ఆ తర్వాత కొద్దిసేపటికి బతకడం, మళ్లీ ఆ తర్వాత చనిపోవడం హైదరాబాదులో తీవ్ర ఉద్రిక్తతకు దారి తీసింది. ఓ వ్యక్తికి కరెంట్ షాక్ కొట్టడంతో అతనిని ఎల్బీ నగర్‌లోని ఓ ఆసుపత్రికి తీసుకు వచ్చారు. అయితే అతను చనిపోయాడని భావించిన ఆసుపత్రి వైద్యులు బంధువులకు డెత్ సర్టిఫికేట్ ఇచ్చారు. ఆసుపత్రి నుండి బయటకు తీసుకు వచ్చిన కాసేపటికే ఆ వ్యక్తి లేచాడు. దీంతో బంధువులు మళ్లీ ఆసుపత్రికి తీసుకు పోయారు. ఈ లోగా ఆ వ్యక్తి మృతి చెందాడు.

దీంతో బంధువులు ఆసుపత్రి ఎదుట ఆందోళనకు దిగారు. మొదటసారి వచ్చినప్పుడు వైద్యం చేయకుండా మృతి చెందినట్లు డెత్ సర్టిఫికేట్ ఇవ్వడం వల్ల వైద్యం ఆలస్యమయి మృతి చెందాడని బంధువులు ఆరోపిస్తున్నారు. బంధువులకు మద్దతుగా ఎమ్మెల్యేలు సుధీర్ రెడ్డి, రాజారెడ్డిలు ఆసుపత్రి ముందు ఆందోళనకు దిగారు. అయితే బాధితుల తరఫున ఆసుపత్రి వర్గాలతో ఎమ్మెల్యేలు జోక్యం చేసుకొని కల్పించు కోవడంతో పరిస్థితి సద్దుమణిగినట్లుగా తెలుస్తోంది.

Published On August 7, 2011