తెరాస నేత పోచారం శ్రీనివాస రెడ్డి అరెస్టు, ఉద్రిక్తం

By Pratap

Published: Saturday, August 20, 2011, 11:54 [IST]

నిజామాబాద్: రాజీవ్ గాంధీ విగ్రహావిష్కరణ నేపథ్యంలో తెలంగాణ రాష్ట్ర సమితి (తెరాస) నాయకుడు పోచారం శ్రీనివాస రెడ్డికి పోలీసులు గృహ నిర్బంధం విధించారు. నిజామాబాద్ జిల్లా బాన్సువాడలో కాంగ్రెసు పార్టీ విగ్రహావిష్కరణను తలపెట్టింది. ఈ కార్యక్రమానికి మంత్రి సుదర్శన్ రెడ్డి, పార్లమెంటు సభ్యుడు షేట్కర్ తదితరులు రావాల్సి ఉంది. అయితే, విగ్రహావిష్కరణను అడ్డుకోవడానికి పోచారం శ్రీనివాస రెడ్డి, తాను ఏర్పాటు చేసిన స్టీరింగ్ కమిటీ సభ్యులతో సిద్ధమయ్యారు. దీంతో పోచారం శ్రీనివాస రెడ్డికి పోలీసులు గృహ నిర్బంధం విధించారు.

గృహ నిర్బంధంలో ఉన్న పోచారం శ్రీనివాస రెడ్డి తనను విడుదల చేయకపోతే ఆత్మహత్య చేసుకుంటానంటూ కిరోసిన్ డబ్బా పట్టుకుని బెదిరించారు. దీంతో పోలీసులు ఆయనను అరెస్టు చేసి బిచ్కుంద పోలీసు స్టేషన్‌కు తరలించారు. పోచారం శ్రీనివాస రెడ్డి అరెస్టును తెలంగాణ జెఎసి నాయకులు ఖండించారు. ఆయనను విడుదల చేయాలని ఆందోళనకు దిగారు. దీంతో బాన్సువాడలో తీవ్ర ఉద్రిక్తత చోటు చేసుకుంది. పోచారం శ్రీనివాస రెడ్డిని విడుదల చేయాలని తెరాస అధ్యక్షుడు కె. చంద్రశేఖర రావు డిమాండ్ చేశారు.

Published On August 20, 2011