విలీనం వల్ల చిరంజీవికి రూ. 300 కోట్లు ముట్టాయి: అంబటి

By Srinivas

Published: Monday, August 22, 2011, 16:49 [IST]

హైదరాబాద్: కాంగ్రెసు పార్టీ తీర్థం పుచ్చుకున్న తిరుపతి శాసనసభ్యుడు చిరంజీవిని, తెలుగుదేశం పార్టీని వైయస్సార్సీ పార్టీ అధికార ప్రతినిధి అంబటి రాంబాబు సోమవారం తీవ్రస్థాయిలో విమర్శించారు. ప్రజారాజ్యం పార్టీని కాంగ్రెసు పార్టీలో విలీనం చేయడానికి చిరంజీవి 300 కోట్ల రూపాయను తీసుకున్నారని అందరూ అనుకుంటున్నారని అది వాస్తవం కాదా అని ప్రశ్నించారు. గత సాధారణ ఎన్నికలలోనూ చిరంజీవి కోట్ల రూపాయలకు సీట్లు అమ్ముకున్నారని ఆరోపణలు వచ్చాయని అవి అవాస్తవాలా అని అడిగారు. చిరంజీవికి తమ పార్టీ అధినేత, కడప పార్లమెంటు సభ్యుడు వైయస్ జగన్మోహన్ రెడ్డిని విమర్శించే నైతిక హక్కు లేదన్నారు.

కాంగ్రెసు తెలుగుదేశం పార్టీతో కుమ్మక్కయిందని మరోసారి రుజువయిందని అంబటి అన్నారు. ఎన్నికలు వస్తే తమకు మూడు సీట్లు కూడా రావడం కష్టమని టిడిపికి తెలుసన్నారు. జగన్ పార్టీకి 200 సీట్లు ఖాయమని కూడా తెలుసన్నారు. అందుకే కాంగ్రెసుతో లాలూచి పడుతుందని ఆరోపించారు. విజయవాడ పార్లమెంటు సభ్యుడు లగడపాటి రాజగోపాల్ సోదరుడు లగడపాటి శ్రీధర్ సిబిఐ అధికారుల ముందు హాజరై వివరణ ఇస్తే వారు సంతృప్తి చెందడం ఆశ్చర్యం కలిగిస్తోందన్నారు.

Published On August 22, 2011