అన్నాహజారేకు సెల్యూట్ చేస్తున్నా: ప్రధాని మన్మోహన్

By Srinivas

Published: Thursday, August 25, 2011, 12:55 [IST]

న్యూఢిల్లీ: సంఘ సంస్కర్త అన్నాహజారే ఆదర్శాలను తాను గౌరవిస్తానని, అందుకు ఆయనకు తాను సెల్యూట్ చేస్తున్నానని ప్రధాన మంత్రి మన్మోహన్ సింగ్ గురువారం లోకసభలో అన్నారు. అన్నాకు నమస్కరిస్తున్నా దీక్షను విరమించాలని విజ్ఞప్తి చేశారు. అవినీతి, అన్నాహజారే అంశంపై లోకసభలో ప్రధాని మాట్లాడారు. లోక్‌పాల్ బిల్లుపై త్వరలో పరిష్కారం లభిస్తుందని ఆశిస్తున్నట్టు చెప్పారు. అవినీతి అంతానికే కేంద్రం కట్టుబడి ఉందన్నారు. వ్యవస్థ ప్రక్షాళనకు అన్ని చర్యలు తీసుకుంటామని చెప్పారు. అవినీతిపై ఎలా స్పందించామో ఆగస్టు 15నే స్పష్టం చేశామన్నారు. దేశ సేవ కోసం శక్తివంచన లేకుండా కృషి చేస్తున్నానన్నారు. తాను ఇరవయ్యేళ్లుగా ప్రజా జీవితంలో ఉన్నానని చెప్పారు. ఆర్థిక మంత్రిగా, ప్రధానిగా ఎన్నో సంస్కరణలు తీసుకు వచ్చినట్లు చెప్పారు. ఏడేళ్లుగా అవినీతి నిర్మూలనకు చర్యలు తీసుకుంటున్నట్లు చెప్పారు. అవినీతిని పూర్తిగా నిర్మూలించాలంటే పరిపాలనా రంగంలో సంస్కరణలు జరగాలని ఆ పని త్వరలో చేస్తామని చెప్పారు.

సంస్కరణ వల్లే అవినీతిని రూపుమాపగలమనే విషయాన్ని ప్రతిపక్షాలు కూడా గుర్తించాలన్నారు. కొన్ని రంగాలలో పోటీ ఎక్కువగా ఉండటం వల్ల అవినీతి రూపుమాపడం కష్టంగా ఉందన్నారు. మన ఆర్థిక వ్యవస్థను ప్రపంచ దేశాలు గౌరవిస్తున్నాయన్నారు. ఇటీవల ఆహార ద్రవ్యోల్భణం పెరిగిందన్నారు. నాపై అవినీతి ఆరోపణలు రావడం బాధాకరం అన్నారు. తన ఆస్తుల వివరాలను ప్రతిపక్ష నేతకు కూడా ఇస్తానని అవసరమైతే పరిశీలించుకోవచ్చునని చెప్పారు. నాపై దాడి వ్యక్తిగతంగా ఉద్దేశించినదే అని అన్నారు. రాష్ట్రాలు సైతం అవినీతికి వ్యతిరేకంగా పోరాటం చేయాలన్నారు. లోక్‌పాల్ బిల్లుపై అన్నాతో కొన్ని అంశాల్లో అవగాహన కుదరలేదన్నారు. అఖిలపక్షంలోనూ అన్నా సూచనలలో ఏకాభిప్రాయం లేదన్నారు.

అవినీతిపై దేశవ్యాప్తంగా రెండు వారాలుగా ఉద్యమం ఉధృతమయిందన్నారు. అన్నా టీం డిమాండ్లను స్టాండింగ్ కమిటీ పరిశీలిస్తోందన్నారు. రాజకీయ పార్టీల ఏకాభిప్రాయంతో లోక్‌పాల్ బిల్లు తయారవుతుందన్నారు. బిల్లుపై అన్ని వర్గాల సూచనలను, సలహాలను పరిగణలోకి తీసుకుంటున్నట్లు చెప్పారు. ఒక మంచి బిల్లు కోసం అందరి భావాలు అవసరం అన్నారు. బిల్లు కోసం అన్నా సహకారం తప్పకుండా తీసుకుంటామని చెప్పారు. అన్నాహజారే ఆదర్శాలను తాను గౌరవిస్తానన్నారు. ఆయన ఆదర్శాలకు సెల్యూట్ చేస్తానన్నారు. అన్నా దీక్షను విరమింప చేసేందుకు ఎంపీలు సహకరించాలన్నారు. ఆయన తన దీక్షను విరమించాలని కోరారు.

Published On August 25, 2011