వైయస్ జగన్‌పై, ఎమ్మార్‌పై ఈడి కేసులు నమోదు

న్యూ ఢిల్లీ: వైయస్సార్ కాంగ్రెసు పార్టీ అధ్యక్షుడు వైయస్ జగన్‌పై ఎన్‌ఫోర్స్‌మెంట్ డైరెక్టరేట్ కేసు నమోదు చేసింది. మనీ లాండరింగ్ సెక్షన్‌ల క్రింద ఈడి కేసు నమోదు చేసినట్టు తెలుస్తున్నది. జగన్ కంపెనీలలోకి ధన ప్రవాహం ఎలా జరిగింది, నిధులు ఎక్కడెక్కడినుంచి ఏయే రూపాలలో దారి మళ్లాయన్న అంశాలపై దర్యాప్తు ఇంకా లోతుగా జరగబోతున్నది. ఫెమా సెక్షన్ల క్రింద కూడా ఈడి కేసులు నమోదు చే సింది. జగన్ కంపెనీలలో పెట్టుబడులు పెట్టిన కంపెనీలు చాలా వరకు బోగస్ అని సిబిఐ ఇప్పటికే తేల్చింది. జగన్ ప్రథమ ముద్దాయిగా ఈడి కేసు నమోదు చేసింది. సిబిఐ చేర్చిన 74 ముద్దాయిలను ఈడి కూడా ముద్దాయిలుగా చేర్చింది.

జగన్ కంపెనీలలో ఎవరెవరు ఏయే కంపెనీల ద్వారా పెట్టుబడులు పెట్టారు, ఎలా పెట్టారు, అవి సక్రమంగా వచ్చిన పెట్టుబడులా, అక్రమంగా వచ్చిన పెట్టుబడులా, మూల సంస్థలు అసలువా, నకిలీవా మొదలైన అంశాలనన్నింటినీ ఎన్‌ఫోర్స్‌మెంట్ డైరెక్టరేట్ పూర్తిగా దర్యాప్తు చేస్తుంది. మారిషస్ నుంచి భారీగా జగన్ కంపెనీలలోకి ఊరూపేరూ లేని కంపెనీల నుంచి పెట్టుబడులు వచ్చినట్టు ప్రాథమిక సమాచారం అందిన దృష్ట్యా ఆయా కంపెనీల చరిత్రను కూడా తవ్వితీసే పనిలో దర్యాప్తు సంస్థలు ఇకముందు నిమగ్నం కానున్నాయి. మొత్తం 22 కంపెనీల నుంచి 195 కోట్ల మేరకు నిధులు అక్రమ పద్ధతిలో మళ్లింపు జరిగినట్లు సిబిఐ దర్యాప్తులో తేలినట్లు చెబుతున్నారు. ఎమ్మార్ ప్రాపర్టీస్‌పై కూడా ఈడి కేసు నమోదు చేసింది. ఎపిఐఐసి మాజీ మేనేజింగ్ డైరెక్టర్ బిపి ఆచార్యను ప్రథమ ముద్దాయిగా పేర్కొంటూ ఆరుగురిపై ఈడి కేసు నమోదు చేసింది.

నిధుల మళ్లింపు, ఫెమా నిబంధనల ఉల్లంఘన అలా ఉండగా హైదరాబాద్, బెంగుళూరు, కలకత్తా, ముంబై, రాజ్‌కోట్, చెన్నై వంటి నగరాల నుంచి కొన్ని కంపెనీలు జగన్ కంపెనీలలోకి పెద్దఎత్తున పెట్టుబడులు పెట్టినట్టు ఇప్పటికే సిబిఐ దర్యాప్తులో తేలినట్లు చెబుతున్నారు.

English summary

Enforcement Directorate has booked case against YSR Congress party president YS Jagan.