ఇబ్బందులు సృష్టిస్తున్నారు: జగన్‌పై బొత్స పరోక్ష వ్యాఖ్య

By Srinivas

Published: Saturday, September 3, 2011, 10:38 [IST]

విజయవాడ: కాంగ్రెసు పార్టీలో ఉన్నప్పుడు లబ్ధి పొందిన కొందరు ఇప్పుడు కొత్తగా పార్టీ పెట్టి కాంగ్రెసుకు ఇబ్బందులు సృష్టిస్తున్నారని ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ శనివారం విజయవాడలో ఏర్పాటు చేసిన మీట్ ది ప్రెస్ కార్యక్రమంలో వైయస్సార్సీ పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డిని ఉద్దేశించి పరోక్షంగా వ్యాఖ్యానించారు. అధికారం కోసం అర్రులు చాస్తూ ప్రభుత్వాన్ని ఇబ్బందులకు గురి చేస్తున్నారని విమర్శించారు. కాంగ్రెసు పార్టీకి ఓ విధానం, సంప్రదాయం, సంస్కృతి ఉన్నాయన్నారు. ఎన్ని ఇబ్బందులు వచ్చినా కాంగ్రెసు ఆ విధానంతోనే ముందుకు వెళుతుందన్నారు.

క్షేత్రస్థాయి సమీక్ష ద్వారా లోపాలను సరిదిద్దుకొని మరిన్ని మేలైన కార్యక్రమాలు నిర్వహిస్తామన్నారు. ప్రస్తుత పరిస్థితుల్లో సున్నతమైన అంశాలు ఉన్నాయన్నారు. అందరూ అర్థం చేసుకొని మెలగాల్సిన అవసరం ఉందన్నారు. రాష్ట్ర ఆర్థిక పరిస్థితి ఇప్పుడిప్పుడే గాడిలో పడుతోందన్నారు. వినూత్న పథకాలు ప్రవేశ పెట్టిన దివంగత ముఖ్యమంత్రి వైయస్ రాజశేఖర రెడ్డిని కాంగ్రెసు ఎప్పుడూ మరిచిపోదన్నారు. కాంగ్రెసు కష్టాల్లో ఉన్న సమయంలో ఆయన నాయకత్వంలో అందరి కృషి ఫలితంగా సోనియా ఆశీస్సులతో అధికారంలోకి వచ్చామన్నారు.

Published On September 3, 2011