హైటెక్ సిటీలో బోర్డు తిప్పేసిన ప్రోడ్జి సాఫ్టువేర్ సంస్థ

హైదరాబాద్: రాజధాని నగరంలో మరో సాఫ్టువేర్ సంస్థ బోర్డు తిప్పేసింది. హైటెక్ సిటీలోని సైబర్ టవర్స్‌లోని ప్రోడ్జి సొల్యూషన్స్ ఐటి సంస్థ రాత్రికి రాత్రే బిచాణా ఎత్తేసింది. దీంతో ఉద్యోగులు, బాధితులు మాదాపూర్ పోలీసు స్టేషన్‌లో ఫిర్యాదు చేశారు. ప్రోడ్జి సొల్యూషన్స్ సైబర్ టవర్స్‌లో ప్రధాన కార్యాలయంగా వరంగల్, విశాఖపట్నం తదితర ముఖ్య నగరాల్లో పది బ్రాంచిలు ఉన్నాయి. ఇందులో సుమారు పదహారు వేల మంది ఉద్యోగం చేస్తున్నట్టుగా తెలుస్తోంది. కేవలం విశాఖపట్నంలోని మధురవాడలో ఉన్న ప్రోడ్జి బ్రాంచిలోనే 150 మంది పని చేస్తున్నట్టుగా సమాచారం. ప్రోడ్జి బోర్డు తిప్పేయటంతో వేలాది మంది ఉద్యోగులు రోడ్డున పడ్డారు.

బాధితులు ఉద్యోగంలో చేరేటప్పుడు ష్యూరిటీ పేరిట ఒక్కో ఉద్యోగి నుండి రూ.50వేల నుండి లక్ష రూపాయల వరకు సంస్థ తీసుకుంది. మొత్తం సుమారు రూ20 కోట్లు సేకరించినట్లుగా తెలుస్తోంది. బాధితుల ఒరిజినల్ సర్టిఫికేట్లు కూడా సంస్థ వద్దే ఉన్నాయి. బాధితులకు మూడు నెలలుగా జీతాలు కూడా చెల్లించట్లేదు. బిటెక్, ఎంటెక్ చేసిన వారికి ప్లేస్ మెంట్ పేరిట ఉద్యోగాలు ఎరవేసి డబ్బులు తీసుకున్నట్లుగా తెలుస్తోంది. ఇటీవల సంస్థ తన ఉద్యోగులను పిలిపించి సంస్థ నష్టాల్లో ఉందని జీతాలు చెల్లించలేని స్థితిలో ఉందని చెప్పినట్లుగా సమాచారం. బాధితులు మాదాపూర్ పోలీసు స్టేషన్ ముందు ఆందోళనకు దిగారు.

English summary

Prodigy Software Solutions cheated software engineers with placement in Andhra Pradesh.